- Eldor aka, hisobni o'yinga mos desa bo'ladimi?

- To'g'ri, natijaga mos o'yin bo'ldi. Bugun jangovar kechgan bahsda durang adolatli natija edi. Sababi, biz ham, raqib ham g'alaba qozonishi mumkin edi. Muxlislar ham bu uchrashuvdan lazzatlanishdi deb o'ylayman. “Dinamo” pastki o'rinda bo'lsada, tarkib va o'yin jihatdan ancha kuchli jamoa. Tarkibida Oliy Liga havosidan bahramand bo'lgan futbolchilar ko'p.

- O'yin borasida qanday fikrdasiz?

- Tengkurashlar ostida boshlangan bo'lim yakunida “Dinamo” Ilhom Yunusovning mahorati evaziga hisobni ochdi. Biz esa dastlabki daqiqalardan ko'zlagan rejamizni amalga oshira olmadik. Ikkinchi bo'limda vaziyatni o'zgartirdik. Yana 4 kundan keyin “Dinamo”ni uyimizda qabul qilamiz. Tiklanish jarayonini tezroq o'tkazib, o'yinga shay bo'lishimiz kerak.

- 1-davra yakunlandi. Barchasi sizning rejangiz asosida kechdimi?

- Shunday desa ham bo'ladi. Faqat, uyimizda “Sho'rtan” bilan ochko yo'qotganimiz yaxshi bo'lmadi. Hozircha 2-o'rindamiz, Superliga maqsadi uchun kurashishda davom etamiz.

- “Dinamo” bilan bahs “Andijon” uchun 1-davradagi eng og'ir o'yin bo'ldimi?

- Faqat Samarqanddagi “Dinamo” bilan o'yin emas, qolgan bahslar ham oson bo'lmadi. Samarqandda ajoyib maydonga ega stadion bor, muxlislar ham yaxshi, “Dinamo” stadionidagi maydonda chiroyli futbol namoyish etish mumkin. Bugun ham yomg'irga qaramay, futbolchilar maydonda miriqib futbol o'ynashdi.

- Raqib jamoa haqida qanday fikrdasiz?

- Dinamoning bugungi o'yini va tarkibi bilan A guruhida so'nggi o'rinda ekanligi men uchun ajablanarli. Buni ko'pchilik kutmagandi. O'ylayshimcha, hali uch davra bor, “Andijon” singari “Dinamo” ham Superliga uchun kurashishda davom etsa kerak.

Usmon Ibodov suhbatlashdi.

Eldor Sakaev: "Superliga maqsadi uchun kurashishda davom etamiz"