Ushbu uchrashuvdan so'ng jamoaning tajribali posboni, O'zbekiston milliy terma jamoasi azosi Eldor Suyunovga bir nechta savollar bilan yuzlandik.

- Dastlab AGMKga qarshi kechgan uchrashuv haqidagi fikrlaringiz bilan o'rtoqlashsangiz. Nima deb o'ylaysiz, raqib chindan ham kuchsiz o'yin namoyish etdimi?

- Mazkur uchrashuvdagi g'alaba raqibning kuchsiz o'ynagani emas, balki bizning kuchli harakat qilganimiz evaziga qo'lga kiritildi deb o'ylayman.

- Birinchi davrada "Paxtakor" stadionida o'tkazilgan o'yinda jamoa qiynalgan va yakunda durang natija qayd etgandi. Kecha esa buni aksini ko'rdik...

- Mavsumning birinchi qismida o'tgan o'yinda jamoamiz yaxshi o'yin ko'rsatgan edi. Shunchaki, o'shanda yaratilgan vaziyatlardan foydalana olmagandik. Futbol kutilmagan natijalari bilan qiziq. O'z maydonimizda durang qayd etgan bo'lsak, mehmonda yirik hisobdagi g'alabani tantana qildik.

- O'zbekiston milliy terma jamoasi bosh murabbiy Vadim Abramov noyabr oyidagi yig'in uchun taklif qilingan futbolchilarni ro'yxatini elon qildi. Sizni ushbu yig'inga chaqirilmaganingiz ko'pchilik qatori bizni ham ajablantirdi. Ushbu holatga munosabatingiz qanday?

- Oldindagi yig'inga chaqirilgan futbolchilarni ro'yxatini ko'rdim. Darhaqiqat ajoyib tarkib. Men qatori barcha futbolchilarga terma jamoada joy kafolatlanmagan. Shuning uchun milliy jamoaga loyiq ekanligingni har kuni isbotlashing kerak. Buni to'g'ri qabul qilaman va kelasi yig'inga qadar murabbiylar ishonchini qozonish uchun harakat qilaman.

- Ko'p hollarda etibor beramiz jamoangiz tomonidan urilgan gollarni nishonlashda boshqalardan ajralib turasiz. Bu borada kimga taqlid qilasiz?

- Jamoam gol ursa tabiiyki xursand bo'laman. Ayniqsa derbilarda, principial raqiblar bilan o'yinlarda gollarni nishonlash men uchun o'ziga hos zavq bag'ishlaydi.

- "Paxtakor" uchun joriy mavsum nisbatan qiyin o'tmoqda. OCHLda ham katta kuch yo'qotildi, jamoaning aksariyat futbolchilar terma jamoa yig'inlarida ishtirok etib qaytdi. Mana shu omillarni inobatga oladigan bo'lsak yangi formatda dekabr oyida o'tadigan kubok bahslariga futbolchilar qanday holatda etib kelishi mumkin?

- Jamoamiz uchun bu mavsum ham ajoyib o'tmoqda. OCHL bahslarida ham yaxshi o'yin namoyish etdik, to'g'ri maqsadimiz bundan ham yuqori edi. Lekin, hamma narsa yaxshilikka deb o'ylayman. Taqdir emas ekan. Katta kuch yo'qotildi degan fikringizga qo'shilmayman. Chunki, milliy terma jamoaning yig'inidan so'ng beshta o'yinni barchasida g'alaba qozondik, to'plar nisbati esa 21:2.

Abdulaziz Iskandarov yozib oldi

Eldor Suyunov: "Terma jamoaga chaqirilmaganimni to'g'ri qabul qilaman. Joy hech kimga kafolatlanmagan"