ФОТО "Барселона" учинчи либосини намойиш этди. У пушти рангда

"Кўк-анорранглилар"нинг собиқ ўйинчиси, бугунги кунда Британия телевидениясида бошловчилик қилиб келаётган Гари Линекер каталонияликларнинг захира (учинчи форма) формасига ҳазиломуз изоҳ берди.

Янги либос пушти рангда бўлиб, ёқа ва енгида қора-яшил рангда ҳошияси бор. Унинг тақдимотида бир қанча вақт муқаддам кетишини эълон қилган, аммо куни кеча жамоада қоламан деб айтиб ўтган Лионель Месси ҳам қатнашган.

"Энди биз Месси нима учун кетмоқчи бўлганини биламиз", - деб ёзди Линекер ўзининг твиттердаги саҳифасида.

Эслатиб ўтамиз, мавсум якунланганидан кейин Месси шартномасидаги текинга кетиш бандидан фойдаланган ҳолда клубни тарк этмоқчилиги ҳақида "Барселона"ни факс орқали огоҳлантирганди. "Кўк-анорранглилар" эса аргентиналикни қўйиб юборишни хоҳлашмади ва келишувдаги ўша банд аллақачон ўз кучини йўқотганини маълум қилишганди. Клуб уни фақатгина шартномада кўрсатилган товон пули (700 млн евро) эвазигагина қўйиб юборишини маълум қилди. Натижада 33 ёшли форвард клуб билан судлашмасликка ва қолишга қарор қилди.

"Энди Месси нима учун кетмоқчи бўлганини биламиз". Линекер "Барселона"нинг янги либосига ҳазиломуз изоҳ берди