Сурия саралаш ўйинларининг охирги босқичини бизнинг гуруҳда ўтказди ва охирги турда Эрон билан 2:2 ўйнаб, учинчи ўринни олди ва плей-офф босқичига йўл олди. Аслида-ку, Суриянинг плей-оффгача етиб келишиёқ катта воқеилик бўлди, бутун Осиё уларни диққат билан кузатиб турди.

Сурия плей-оффда Австралияга қарши иккита баҳс ўтказди. Биринчисида 1:1 қайд этган бўлса, Сиднейдаги жавоб учрашувида 1:2 ҳисобида мағлуб бўлди. Ўша ўйинни кўрганлар билишади: агар охирги дақиқаларда Омар Ал Сома жарима тўпидан гол урганида борми, балки Сурия Гондурас билан баҳсга тайёргарлик кўрармиди.

Хуллас, Сурия эртаги тугади ва эндиликда бир савол қизиқтиряпти: жамоа буёғига нима қилади? ОФК сайти ходимлари ушбу саволга жавоб беришга ҳаракат қилиб кўришди.

Кейинги манзил - Осиё Кубоги-2019

Эндиликда суриялик мураббийлар олдидаги вазифа терма жамоани Осиё Кубоги-2019га тайёрлаш бўлади. Маълумки, навбатдаги Осиё чемпионати 2019 йилнинг январида БААда бўлиб ўтади. Ушбу мусобақада Сурия ўз тарихида олтинчи бор иштирок этади. Агар Сурия Осиё Кубогида ҳам ЖЧ саралаш босқичидагидек ўйин кўрсатса, улардан ҳатто ярим финалга қадар етиб бориши мумкин.

Бундан ташқари, охирги тўрт ўйинда учта гол урган Ал Сома терма жамоага чақирилиб турса, ундан ҳар нарса кутиш мумкин. Айтганча, Ал Сома шу пайтгача ўз клуби "Ал Аҳли" сафида 108та учрашувда майдонга тушиб, 111та гол урган.

Бошқа иқтидорлар

Омар Ал Сома - кучли ҳужумчи, лекин бу Сурия таркиби фақат шу футболчидан иборат дегани эмас. Айнан саралаш ўйинлари орқали мухлислар Омар Хрбин, Маҳмуд Ал Мавас, Фирас Ал Хатиб каби номларни ҳам билиб олишди. Эндиликда Ал Сома сингари Омар Хрбин ҳам Саудия чемпионатида тўп тепмоқда. Унинг клуби - "Ал Ҳилол". 23 ёшли футболчи "Ал Ҳилол" билан бу мавсум Осиё чемпионлар лигасида ғолиб чиқишни мақсад қилган.

Гарчи жаҳон чемпионатига чиқиш орзуси ушалмаган бўлса-да, сурияликлар терма жамоа кўрсатган ўйиндан хафа бўлишмади. Улар мамлакатда футбол янада юксалишига ишонишмоқда. Бундан ўн йиллар муқаддам "Ал Карама" клуби ОФК Кубоги ва Осиё чемпионлар лигасидаги иштирок туфайли кўпчилик эътиборини ўзини тортганди. Энди бўлса Дамашқнинг "Ал Ваҳда" клуби халқаро мусобақаларда ўзини кўрсатишга ҳаракат қиляпти.

Мамлакатдаги сиёсий нотинч вазиятни ҳисобга олмаганда, Сурияда футбол аввалдан бўлган ва ҳозир ҳам бор. Гарчи миллий терма жамоа уй учрашувларини бетараф майдонда ўтказаётган бўлса-да, мухлислар имкон қадар бориб қўллаб-қувватлашга ҳаракат қилишмоқда. Уларнинг фикрича, жамоанинг ҳозирги авлодига ишонч катта ва Осиё Кубогида Суриядан кўп нарса кутса бўлади.

Энди Сурия буёғига нима қилади?