Mahalliy saytlardan birida yozilishicha, Eron chempionatida VAR texnologiyasidan foydalanishning allaqachon vaqti kelgan, biroq nimadir sabab bo'lib doim ish paysalga solinyapti. Natijada juda ko'p jamoalar VAR yo'qligi sabab hakamlarning jiddiy xatolaridan aziyat chekmoqda.

Masalan, "Istiqlol" - "Persepolis" bahsining 3-daqiqasidayoq hakam "Persepolis" darvozasiga penalti belgilashi kerak edi, lekin unday bo'lmadi. Bu hol "Istiqlol" murabbiylarining noroziligiga sabab bo'ldi. O'z navbatida "Persepolis" rahbariyati ham uchrashuv hakami Mohamadreza Akbarianning bazi qarorlariga noroziligini bildirdi.

Eron chempionatida klublarning hakamlardan noroziligi birinchi bor kuzatilayotgani yo'q. Deyarli har turdan so'ng kimdir hakamlarni tanqid qilib chiqmoqda. Bu haqda sobiq hakam Navid Mozafari shunday dedi:

"Avvalo shuni aytish kerak, VAR katta byudjetli texnologiya hisoblanadi. VAR bilan ishlash uchun hakamlarni ham alohida o'qitish kerak. Lekin men VAR kelib hakamlarga bo'layotgan bosim yo'qoladi deb o'ylamayman, chunki bizda hakamni tanqid qilish madaniyati yillar davomida shakllanib qolgan va bundan birdaniga voz kechish qiyin. Siz eronlik futbolchilar va murabbiylar VARning ishidan to'liq qoniqadi deb hisoblaysizmi? Men esa yo'q".

"Yana bir bor qaytarib aytaman, VAR bizga kerak. Lekin menga aytishlaricha, VAR texnologiyasining bir mavsum ishlab berishi uchun 6,2 million dollar pul kerak bo'ladi. Xo'sh, bu pullarni kim to'laydi? Biz avvalo futbolga bo'lgan qarashni o'zgartirishimiz lozim, murabbiylar mag'lubiyatdan so'ng aybni hadeb hakamlarga ag'daverishni bas qilishlari kerak, shundagina nimadir o'zgarish bo'ladi. Chunki ayb faqat hakamlarda emas. Ishoning, VAR kelib ham baribir hakamlar ishi muhokama qilinaveradi", - deydi sobiq hakam Navid Mozafari.

Eron chempionati VAR yo'qligidan aziyat chekmoqda