Mamlakatning "Eng yaxshi futbolchisi" deb 30 yoshli Vohid Amiri topildi. "Persepolis" klubi sobiq futbolchisi darhaqiqat yakuniga etgan mavsumni yuqori notada o'tkazdi. U ham klub, ham terma jamoa miqyosida o'zini ko'rsata oldi. Amiri forslar tarkibida JCH-2018ning uchala o'yinida ham ishtirok etdi. Yaqinda ushbu futbolchi Turkiyaning "Trabzxonspor" klubiga ko'chib o'tdi.

"Eng yaxshi klub" sifatida amaldagi chempion "Persepolis" etirof etildi. Bu jamoa chempionat tugashiga uch hafta qolganida chempionlikni rasmiylashtirdi. Eron Pro ligasida 19ta gol urgan Ali Alipur "Eng yaxshi to'purar" sovrinini qabul qilib oldi. "Eng yaxshi himoyachi" sovrini "Persepolis" sardori Jalol Hussayniga nasib etgan bo'lsa, ushbu klub posboni Alirizo Beyranvand "Eng yaxshi darvozabon" deb topildi.

Shuningdek, Umid Ibrohimi "Eng yaxshi yarim himoyachi", hamyurtimiz Server Jeparov esa "Eng yaxshi assistent" deya etirof etildi. Malumki, Jeparov yakuniga etgan mavsumni Tehronning "Istiqlol" klubida o'tkazdi. "Paykan" himoyachisi Mehdi Shiri "Feyr pley" sovrinini qabul qilib oldi. Bijan Haydari esa yilning "Eng yaxshi hakami" deb topildi. Va nihoyat "Eng yaxshi murabbiy" sovrini "Persepolis" ustozi Branko Ivankovichga nasib etdi.

Eronda eng yaxshilar aniqlandi, ular orasida hamyurtimiz ham bor