Xususan, muxlis va mutaxassislar ham o'zlarining turli fikrlari, munosabatlarini bildirishyapti. Mazkur bahs oldidan o'zbekistonlik ayniqsa "Nasaf" muxlislari yoqimtoyi, turkmanistonlik Artur Gevorkyanga bir nechta savollar bilan yuzlandik. Uning fikrlari quyidagicha bo'ldi.

- So'nggi marotaba "Axal" jamoasida to'p tepdingiz. Ko'pchilikni qiziqtirayotgan savol Artur Gevorkyan hozir qaerda? Futboldamisiz yoki faoliyatingizni boshqa soha bilan bog'ladingizmi?

- Avvalo O'zbekistondagi barchaga alangalik salomimni yo'llayman. Men allaqachon futbolda emasman. Biznes, oila, shaxsiy yumushlar bilan shug'ullanyapman. Oilamga vaqt ajratmoqdaman.

- "Sho'rtan", "Paxtakor", "Nasaf", "Lokomotiv", "Qizilqum". Qaysi jamoaning natijalari ko'proq etiboringizda turadi?

- Biror jamoani ajratib ko'rsatmoqchi emasman. Har bir jamoada yaxshi yigitlar jamlangan. O'zining ajoyib muxlislariga ega. Lekin men "Nasaf" bilan ko'p narsaga erishdim, hech qaerda olmagan tajribamni oldim. Buning uchun barcha murabbiylar va hamkorlarga rahmat aytishni unutmasligim kerak.

- "Nasaf" haqida fikringizni davom ettirsak. Chempionlik uchun jamoaga nima etishmayapti?

- "Nasaf"ni to'xtatmay kuzatib boraman. Murabbiylarning tizmli ishiga shunchaki qoyil qolish kerak. Ularning ayrimlari bilan hamon muloqot qilib turaman. Bunday barqarorlikni, klub oldiga qo'yilgan vazifalarni bajarilishini hech qachon ko'rmaganman. Ularga bir kun baribir chempionlik kubogini qo'lga kiritishlarini tilayman. Xudo xohlasa klub bu ishni uddasidan chiqadi.

- Dragan Cheran sizdan keyingi "Nasaf" va O'zbekistonning eng yaxshi legioneri bo'ldimi?

- U juda yaxshi ijrochi. Har yili ko'rsatadigan o'yinlari O'zbekistondagi eng yaxshi hujumchilardan biri ekanligidan dalolat beradi. Omad tilayman.

- O'zbekiston - Turkmaniston qarama-qarshiligidan qanday o'yin kutyapsiz?

- Eng muhimi stadionga kelgan muxlislar zerikib qolishmasin. Jamoalar chiroyli va tomoshabop futbol bo'lsin. Albatta uchrashuvni tomosha qilaman. Menga ham bu qiziq.

"Ertaga eng muhimi muxlislar o'yindan zerikib qolishmasin" - Artur Gevorkyan O'zbekiston - Turkmaniston uchrashuvi oldidan