Shu munosabat bilan ertaga mazkur musobaqaga qura tashlash marosimi o'tkaziladi. Qura marosimi Bangkokdagi "Rama Gardens" mehmonxonasida tashkil etiladi.

Qura mexanizmiga ko'ra, 16 jamoa to'rttadan 4 guruhga bo'linadi va har bir guruhdan ikkitadan jamoa keyingi bosqichga yo'l oladi. Musobaqa yakunida kuchli uchlikdan joy olgan jamoalar Tokio-2020 Olimpiada o'yinlariga yo'llanma oladi.

Bilasiz, navbatdagi Olimpiada o'yinlari 2020 yil Tokioda tashkil etiladi. Olimpiada o'yinlarining futbol musobaqasi uchun Osiyoga mezbon Yaponiyadan tashqari yana uchta o'rin ajratilgan. Agar Yaponiya olimpiya terma jamoasi U-23 Osiyo chempionatida yarim finalga qadar etib borsa, unda to'rtinchi o'rinni qo'lga kiritgan jamoa qo'shimcha imtiyozga ega bo'ladi.

2020 yilgi U-23 Osiyo chempionatida qatnashadigan barcha 16 jamoa nomi malum. Bular - Tailand (mezbon), Qatar, Bahrayn, Iroq, BAA, Iordaniya, O'zbekiston, KXDR, Janubiy Koreya, Yaponiya, Xitoy, Vetnam, Avstraliya, Eron, Suriya va Saudiya Arabistoni.

Shuningdek, savatchalar ham aniq. O'zbekiston U-23 terma jamoasi 2018 yilgi musobaqada chempionlikni qo'lga kiritgani bois 1-savatchada bo'ladi.

1-savatcha: Tailand (mezbon), O'zbekiston, Vetnam, Qatar

2-savatcha: Janubiy Koreya, Iroq, Yaponiya, KXDR

3-savatcha: Xitoy, Avstraliya, Iordaniya, Saudiya Arabistoni

4-savatcha: Suriya, Eron, BAA, Bahrayn.

Malumot uchun, OFK Olimpiada o'yinlari uchun alohida saralash o'tkazishdan voz kechib, U-23 Osiyo chempionatini yo'lga qo'ygan.

Birinchi musobaqa

U-23 Osiyo chempionati birinchi bor 2014 yil Ummonda o'tkazilgan. Bunda Iroq chempionlikni qo'lga kiritgan, Saudiya Arabistoni esa ikkinchi o'rinni egallagan.

O'zbekiston terma jamoasi birinchi musobaqada guruh o'yinlarini Iroq, Saudiya Arabistoni va Xitoyga qarshi o'tkazib, faqat Xitoyni mag'lub etgan holda uch ochko bilan guruhdan chiqa olmagan.

Ikkinchi musobaqa

Ikkinchi musobaqa 2016 yil Qatarda tashkil etilgan va Olimpiada yo'llanmasi uchun kurash kechgan. Yakunda chempion Yaponiya, ikkinchi o'rin sohibi Janubiy Koreya va uchinchi o'rinni qo'lga kiritgan Iroq Braziliyada bo'lib o'tgan Olimpiada o'yinlariga yo'llanma olgan.

O'zbekiston U-23 terma jamoasi bu musobaqada ham guruhda qolib ketgan. Vakillarimiz guruh bahslarini Janubiy Koreya, Iroq va Yamanga qarshi o'tkazib, faqat Yamanni mag'lub etgan holda yana uch ochko bilan chiqa olishmagan.

Uchinchi musobaqa

Uchinchi musobaqa o'tgan yilning yanvar oyida Xitoyda tashkil etildi. Bunda Ravshan Haydarov boshchiligidagi O'zbekiston terma jamoasi chempion bo'lganini juda yaxshi bilasiz. Futbolchilarimiz qorli finalda Vetnamni mag'lub etishgandi. Uchinchi o'rinni Qatar qo'lga kiritgan bo'lsa, Janubiy Koreya to'rtinchi o'rin bilan cheklangan.

To'rtinchi musobaqa

Kelasi yil Tailandda bo'lib o'tadigan U-23 Osiyo chempionati hisob bo'yicha to'rtinchisi bo'ladi. Bu musobaqada Olimpiada yo'llanmasi uchun kurash kechishini hisobga olsak, yanada qiziq o'tishiga shubha yo'q. Tabiiyki Lyubinko Drulovich boshqarayotgan terma jamoamiz oldiga Olimpiada yo'llanmasini qo'lga kiritish vazifasi qo'yiladi.

Ertaga U-23 Osiyo chempionatiga qura tashlanadi