Мусобақанинг илк учрашувида Ўзбекистон ўсмирлар терма жамоаси Туркманистон ўсмирлари устидан 5:1 ҳисобида устун келди. Биз ўйин тугагач Ўзбекистон терма жамоаси бош мураббийи Темур Олимхўжаевнинг фикрлари билан қизиқдик.

"Аввало бу мусобақа ташкилотчиларига миннатдорчилик билдираман. Осиё қитъасининг энг кучли жамоалари иштирокидаги мусобақа биз учун айни муддао бўлди. Хабарингиз бор, сентябрь ойида Ҳиндистонда U16 Осиё чемпионатида ўтказилади. Бизнинг жамоа мана шу турнирга тайёргарликни бугунги ўйин билан бошлади. Менимча йилдаги дастлабки учрашув учун ёмон ўйнамадик. Бир қатор янги футболчиларни синовдан ўтказиб олдик, бундан ташқари ўйин тактикасида ҳам ўзгаришларни амалга ошириб синаб кўрдик. Эрон ва Японияга қарши учрашувларга янада кучлироқ тайёргарлик кўрамиз. Бу мусобақадаги мақсадимиз ғолиб бўлиш".

"Ҳиндистондаги Осиё чемпионатигача 6 ой вақт қолмоқда. Терма жамоа эшиги барча футболчилар учун очиқ. Яъни ҳозирда таркибда йўқ футболчилар ўзларини кўрсатишса қитъа чемпионатига боришлари мумкин. Барчаси уларнинг ўз қўлларида. Ўша пайтга бориб ким тайёр бўлса ўша Ҳиндистонга боради. Бизда соғлом рақобат, кучлимисан марҳамат майдонга туш ва ўйна. Ҳиндистонга Жаҳон чемпионати йўлланмасини қўлга киритиш учун борамиз", - дейди Темур Олимхўжаев.

Нарзулла Сайдуллаев

"Эртанги кун спорти". Темур Олимхўжаев: "Мусобақадаги мақсадимиз чемпионлик"