Bu qutlug' sana bilan ustoz Evgeniy Borisovichni samimiy tabriklaymiz va u kishiga tinchlik xotirjamlik, sihat salomatlik tilaymiz!

Evgeniy Valickiy futbolchilik faoliyatini Toshkentning “Spartak”, “Trud” jamoalarida o'tkazgan. 1961 yildan boshlab esa murabbiylik sohasida xizmat qilib kelgan. Toshkentning SKA, “Sokol” jamoalarida tajribasini boyitdi. Aynan “Sokol” jamoasi bilan Qurolli Kuchlar kubogini qo'lga kiritgach, 1963 yilgi mavsumning “Paxtakor” stadionidagi ochilish uchrashuvida 60000 tomoshabin ko'z o'ngida Evgeniy Valickiyga “O'zbekistonda xizmat ko'rsatgan murabbiy” faxriy unvoni topshirilgan.

1964-1971 yillar oralig'ida mamlakatimizning bosh jamoasi “Paxtakor”da o'sha paytning mashhur mutaxassislari – Aleksandr Abramov, Mixail Yakushin, Boris Arkadev, Evgeniy Eliseev, Aleksandr Keller singari murabbiylariga yordam bergan va malakasini oshirgan. Malum muddat Semipalatinskning “Spartak”, Aktyubinskning “Aktyubinec” jamoalarida faoliyat yuritgach, 1981 yildan etiboran yana O'zbekistonga qaytgan va viloyat jamoalarining tiklanishida o'zining munosib hissasini qo'shgan. Jumladan, Evgeniy Borisovichning sayi harakatlari bilan “Neftyanik” (Farg'ona), “Narimanovec” (Xorazm), “Sohibkor” (Halqabod) jamoalari sobiq Ittifoq birinchiliklarida o'z o'rni, mavqeiga ega bo'lgan. Juda ko'plab shogirdlar etishtirdi. Ular orasida o'z jamoalariga sadoqat ko'rsatgan Yuriy Sarkisyan, Rustam Mirsodiqov singari mutaxassislar bor.

1990 yildan etiboran Evgeniy Borisovich o'z bilim va tajribalarini shogirdlari qalbiga chuqurroq singdirish maqsadida “Shaxtyor” (Angren), “Umid” (Toshkent), “Navbahor” (Namangan),MHSK (Toshkent), “Do'stlik” (Toshkent viloyati) jamoalarida bosh murabbiy yordamchisi bo'lib xizmat qildi. Shogirdlari bilan birgalikda O'zbekiston chempioni, mamlakat kubogi sohibi, sovrindor bo'ldi. Nafaqada bo'lsada sevimli kasbini tashlamadi va “Qizilqum”, “Metallurg” jamoalarida yoshlar tarbiyasi bilan shug'ullandi.

Biz Evgeniy Borisovichni barcha o'zbek futboli muxlislari, mutaxassislari hamda shogirdlari nomidan tavallud ayyomi bilan yana bir bor samimiy muborakbod etamiz va bardamlik, xush kayfiyat sizni aslo tark etmasin ustoz, deb qolamiz!

Evgeniy Valickiy 89 yoshda, tabriklaymiz!