Amalda ham shunday bo'ldi. Bu guruhdagi har bir o'yin va qayd etilayotgan natijalar haqiqatdan ham futbol muxlislarning etiborini qozona olayapti. Dastlabki turda O'zbekiston kubogining amaldagi sohibi hisoblanadigan "Nasaf" Qarshida "Navbahor"ni qabul qildi. O'tkir Yusupov fantastik o'yin ko'rsatib yuborgan uchrashuvda Samvel Babayan jamoasi kichik hisobdagi g'alabaga erishdi. "Andijon" va "Dinamo" o'rtasidagi guruhning ikkinchi o'yini ham "O'lim guruhi" maqomiga xos tarzda o'tdi, Andijondagi dramada 2:2 hisobidagi jangovor durang natija qayd etildi. 1-tur uchrashuvlaridayoq keskinlikning yuqori notaga chiqib ketganligi bu guruhda navbatdagi bosqich uchun kurash so'ngi turning eng so'ngi soniyalariga qadar davom etishini anglatayotgandi.

"H" guruhining ikkinchi tur uchrashuvlari ham futbol muxlislariga shiddatli to'qnashuvlarni taqdim etib berdi. "Navbahor" o'z maydonida "Andijon"ni 2:1 hisobida mag'lubiyatga uchratdi va navbatdagi bosqich masalasini muddatidan avval hal qildi. Jizzaxda "Dinamo" va "Nasaf" o'rtasida kechgan bahs esa O'zbekiston kubogi joriy mavsumining eng yorqin to'qnashuviga aylanib ketdi, super o'yin. Bu uchrashuvda har ikki tomon ham shunchaki mag'lubiyatga rozi emasdi, g'alaba uchun kurash hakamning final hushtagi chalinguniga qadar davom etdi. 3:3 hisobida yakunlangan o'yin, jangovor durang va taslim bo'lishni istamagan ikki jamoaning super qarama-qarshiligi. O'rinli savol tug'iladi, nega biz Jizzaxda dramaga aylanib ketgan ushbu uchrashuvni televidenie orqali jonli efirda ko'rmadik?

"Navbahor" ortda qolgan 2 ta tur uchrashuvlaridan so'ng guruhda muddatidan avval birinchi o'rinni qo'lga kiritdi. "Nasaf", "Andijon" yoki "Dinamo" jamoalari so'ngi turda qanday natijaga qayd etishlaridan qatiy nazar 6 ochko to'play olishmaydi. Guruhdagi ikkinchi yo'llanma uchun kurash shu 3 ta klub o'rtasida kechadi.

Jizzaxdagi super o'yin yakunida tashkil etilgan matbuot anjumanida qarshiliklar bosh murabbiyi Ro'ziqul Berdiev endilikda barchasi "Navbahor"ning qo'lida qolganini, Namangan klubi o'zi istagan jamoani navbatdagi bosqichga olib chiqishi haqida aytib o'tdi. Vadim Abramovda ham shunga yaqinroq fikrlar bo'ldi, samarqandliklar ustozi ko'p narsa so'ngi turdagi "Dinamo" - "Navbahor" to'qnashuvi natijasiga bog'liqligini takidladi. Futbol muxlislarida Samvel Babayanga so'ngi turda rotaciyalar bilan bog'liq savol borligini his etgan jurnalistlar "Navbahor" bosh murabbiyidan ayni masalada izox olishdi. Babayan "Navbahor" uchun har bir o'yin navbatdagi uchrashuvlarga tayyorgarlik vazifasini o'tab berishini, jamoa "Dinamo"ga qarshi bahs orqali Superliga bahslariga tayyorgarlik ko'rishi haqida fikr bildirdi. Namanganliklar bosh murabbiyining fikrlaridan kelib chiqsak, "Navbahor" Jizzaxga yoshlar tarkibi bilan "Dinamo"ga shunchaki yutqazib ketmaydi.

Guruhning so'ngi 3-tur uchrashuvlari 28-aprel sanasiga belgilangan. Shu kuni "Andijon" o'z maydonida "Nasaf"ga qarshi maydonga chiqsa, futbol muxlislari Jizzaxda "Dinamo" - "Navbahor" to'qnashuviga ham guvoh bo'lishadi. Bir xil sana va ayni bir vaqtda boshlanadigan o'yinlar.

So'ngi tur oldidan "Navbahor"da 6, "Dinamo"da 2, "Nasaf" va "Andijon"da 1 ochkodan mavjud. Falakning gardishi bilan kubokning amaldagi sohibi hisoblangan "Nasaf" mazkur musobaqani guruh bosqichidayoq yakunlashga majbur bo'larmikan, nima deb o'ylaysiz?

Bekzod Tolibov

Falakning gardishi (Bekzod Tolibov blogi)