Nishonov: "Yigitlarga rahmat aytaman. "Aral" istalgan jamoaga kurash taklif qila oladigan jamoa. Bu bahsga yaxshi tayyorgarlik ko'rdik deb o'ylayman. Imkoniyatlardan unumli foydalanishga harakat qildik, yigitlar ko'rsatmalarni bajarishga intilishdi".

- "Olimpik-MobiUz" hujumkor o'yin namoyish etdi, ammo raqib gol urganidan so'ng negadir jamoangiz koncentraciyani yo'qotib qo'ydi va "Aral" yana uchta gol urishga yaqin kelishdi...

- To'g'ri, 2:0dan so'ng yigitlar biroz bo'shashishdi. Yuqoriroqda o'ynaydigan futbolchilarimiz pressingdan to'xtashdi va raqib ko'pchilik bo'lib hujumga o'tdi, natijada "Aral" gol urib ketdi.

- "Olimpik-MobiUz" yoshlardan iborat jamoa. 60 daqiqadan so'ng ko'plab futbolchilaringizni oyog'i tortishib qoldi. Pro ligada o'yin kam. Shu narsa futbolchilarning tayyorgarligiga tasir qilyaptimi?

- Bu fakt ham tasir qilyapti. Ammo terma jamoa yig'inlarini unutmaslik kerak. Qozog'iston bilan bahsda 10 nafar futbolchimiz ishtirok etdi, U-18 jamoasida ham 3 nafar vakilimiz bor. Hisobdan kelib chiqib, o'yinni cho'zishga uringan bo'lishlari mumkin. Bahsdan so'ng ularga yuzlanganimda "Hammasi joyida" deyishdi. Bunday qilish noto'g'ri, o'sishni, rivojlanishni istaydigan futbolchi 90 daqiqa maksimal o'ynashga intilishi kerak.

- Jamoa Superligaga chiqsa, kelasi mavsum uchun tarkibni kuchaytirish rejalaringiz bormi?

- Agar Superligaga yo'l olsak, tarkibni kuchaytirmasak bo'lmaydi. Lekin ushbu futbolchilarni saqlab qolgan holda yangi o'yinchilarni jalb qilishimiz shart.

Farhod Nishonov: "2:0dan so'ng yigitlar biroz bo'shashishdi"