Ўйиндан сўнг ташкиллаштирилган матбуот анжуманида "Обод" жамоаси директори Фарҳод Сафаров иштирок этди.

"Ўйин биз учун қийин ўтди, сабаби анчадан буён ғалаба нималигини билмай келаётган эдик. Учрашув бошидаёқ Тимур Ҳакимов тўп киритгани йигитларга қўшимча ишонч бағишлади. Футболчилар танаффусда берилган кўрсатмаларни аъло даражада бажаришди. Бугунги ўйиндан қониқдик", - дея сўз бошлади Ф.Сафаров.

- Нима учун бугун захира ўриндиғида Жафар Ирисметов йўқ эди?
- Жафар Ирисметов ўйиндан 2 соат олдин ҳам базада биз билан бирга эди. Афсуски, соғлиғи бироз ёмонлашгани боис унга жавоб бердик. Насиб қилса, кейинги ўйинларда у захира ўриндиғида бўлади ва ўйинчиларимизга ўзи бевосита кўрсатмалар бериб туради. Бугунги ўйинга ҳам жамоани Ирисметов тайёрлаган.

"Ҳозир жамоа бироз қийин ҳолатда, сабаби охирги ўрин бизни қониқтирмайди. Шунинг учун ҳам кўпроқ ҳужумга эътибор беришга ва гол уришга интилаяпмиз. Чиройли ўйин эмас, натижа тарихда қолади дейишади. Биз айни пайтда натижа кўрсатишимиз керак, бунга мажбурмиз," - дея сўзини якунлади Фарҳод Сафаров.

Фарҳод Сафаров: "Биз айни пайтда натижа кўрсатишимиз керак"