Унда биринчи бўлиб Ўзбекистон миллий терма жамоаси аъзоси Фарруҳ Сайфиев билан мухлислардан келган саволлар асосида суҳбат ташкил қилинди.

Суҳбат сўнггида "Фара" кейинги қаҳрамон сифатида, дўсти Элдор Суюновни танлади. Эндиги саволларни дарвозабон учун йиғамиз, у ҳам Сайфиев каби 7та энг қизиқ саволни аниқлайди ва якунда Фарруҳ Сайфиевнинг 7 кишилик мухлислар жамоаси, Элдор Суюнов жамоасига қарши шоу ўйинида майдонга чиқадилар.

- Тасаввур қилинг: сиз фаолиятингиз сўнгида легионер сифатида Европанинг ўртамиёна жамоасида тўп тепяпсиз. Интервьюларингиздан бирида "Ўзбекистонга қайтсам, ярим мавсум ўйнайман ва шундан сўнг бутсаларимни михга иламан" дегансиз. Сизга 4 та клубдан таклиф тушди. Булар – ўзингиз туғилиб ўсган вилоятингиз жамоаси "Динамо", футболчи бўлишингизга катта ёрдам берган ""Машъал", Фарруҳ Сайфиев бўлиб танилишингизга сабабчи бўлган "Насаф" ҳамда юқори даражага чиқиб, легионер бўлишингизга хизмат қилган "Пахтакор". Чуқурроқ тасаввур қиламиз, биринчи даврадан кейин уларнинг очкоси деярли бир хил ва чемпионлик учун айнан шу клублар курашишмоқда. Сиз қайси бирини танлаган бўлардингиз? (Офлайн УЗБ Хажжи)

- Менимча, улардан бирортасини танламасам керак. Қайтгач, дарҳол бутсаларимни михга иламан. Чунки биринчидан, Самарқанд туғилиб ўсган шаҳрим. Иккинчидан, "Машъал" академиясида етишиб чиққанман. Учинчидан, "Насаф"да футболчи сифатида танилиб, ўсдим. Тўртинчидан, "Пахтакор"да яна ҳам яхши футболчи сифатида етишиб чиқдим деб ўйлайман. Жуда қийин вазият бу.

- Нима учун "Насаф"га қарши ўйинларда аламзада ҳолатда тўп тепасиз. Тўғри, буни тушунаман, ишингиз шундай. Бироқ Элдор Суюнов ва бошқа собиқ "Насаф" футболчиларида бу сезилмайди... (Жонибек Назаров)

- Майдонга фақат "Насаф"га қарши эмас, барча жамоалар билан ўйинларда ҳиссиётлар бўлади. Учрашув якунлангач бу нарса йўқолади. Ҳамма ўйинда шундай.

- Агар "Навбаҳор"га гол урсангиз, уни "Навбаҳор" мухлислари олдида нишонлашдан қўрқмайсизми? (8181)

- Йўқ, албатта. Нимадан қўрқишим керак? 2019 йил "Навбаҳор" билан ўйинда стадион мухлислар билан тўла эди. 3:3 ўйнаганмиз. Учинчи голни урганимда нишонлаганман.

- Бугунги Фарруҳ Сайфиев 10 йил аввалги Фарруҳ Сайфиевга кучли бўлиш, хатоларини такрорламаслик учун қандай маслаҳат берган бўларди? (Юнус Рустамов)

- Меҳнат, фақат меҳнат қилиш. Ўша пайтда шароитлар ҳозиргидек бўлмаган. Қийналган вақтимиз кўп бўлган. Балки шу сабабдир.

- Осиё Кубоги-2015 да ҳакам нега сизга сариқ карточка кўрсатганди? Сиз захира ўриндиғида эдингиз... (Роберто Баджо)

- Бизга қарши қўполлик ишлатилганди. Захирадаги футболчилар эътироз билдириб, майдонга тушиб кетишга жуда яқин келганмиз. Ҳакам кўпчилик футболчилар ичидан айнан мени пайқаб қолиб, огоҳлантирганди.

- "Насаф"да тўп тепган пайтларингизда кўп танқидга учрар эдингиз. Рўзиқул Бердиевдан нима учун сизни майдонга тушираётганини сўрашганда, мураббий мақтар эди. Фақатгина маҳаллада футбол ўйнамагани билиниб қоляпти, деганди. Шунда айнан қайси хислатингизга қараб бундай жавоб бергандилар? (Ҳабибулло Ҳаллилаевич)

- Кунимиз футбол билан ўтган. Болалар спорт мактабида машғулот ўтказганимизда ҳам, маҳаллада футбол ўйнардик.

- Онангизга биринчи маошингиздан нима совға қилгансиз? (Фарҳодова Севинч, Солиҳа Нуриддиновна)

- Маошимни онамга олиб бориб берганман.

- Сизга Худо томонидан берилган олий неъмат нима деб ўйлайсиз?

- Энг олий неъмат – Аллоҳ таоло бизни мусулмон қилиб яратгани.

- Ўзингизни 7 та авлодингизни биласизми? Яъни шажара. Ўзингизни синаб кўринг-чи? (Uzbekxan)

- Очиғи, қизиқмаган эканман.

- Фарруҳ Сайфиев болаликдан "Пахтакор"да ўйнашни орзу қилганми ёки трансфер орқали пойтахт клубига келиб қолдими? (Chief Accountant)

- Ҳар бир футболчи ёшлигидан яхши клубларда ўйнашни орзу қилади. Шартномам тугаётган палла мавсум охирида "Пахтакор"дан таклиф бўлган. Жаъфар Ирисметов қўнғироқ қилганлар. Шундан кейин шартнома туздик.

- Яхши спорт формасидаги Виталий Денисов ва худди шундай ҳолатдаги Фарруҳ Сайфиев. Қайси бири кучлироқ? (Муслим)

- Албатта, Виталий Денисов. Топ-клубларда ўйнаган. Реал олиб қараганда ҳам Денисов.

- Жамоаларимизда мураббийлар тез-тез алмашади. Мазкур ҳолат тўғрими ёки нотўғри? Ҳар бир мураббийнинг ўз услуби ва талаби бор. Бу сизларга қийинчилик туғдирмайдими? Мураббийлар ўзгариши натижасида футболчиларимиз ўз ўйинини йўқотиб қўяди-ку. Бунга қандай қарайсиз? (Муслим)

- Албатта, бу таъсир қилади. Мавсум бошида битта мураббий ўз тактикасини олиб киради. Унга футболчилар мослашиши керак. Мураббий натижа қилмаганидан кейин ишдан олишади. Уни ҳам бошқа тактикаси бор. Мослашиш вақт талаб қилади.

- Мен бир неча бор машқлар жараёнидан келадиган видеолавҳаларни кўриб, сиз ва Элдор Суюнов орасида турли ҳазил, қизиқ воқеаларга гувоҳ бўламан. Элдор билан дўстлигингиз неча йиллардан бери давом этиб келади? (Эркин Ишмухамедов)

- Бу 2007 йилдан бери. Элдор билан "Машъал" академиясига борганимда танишганман.

- Ака битта форма керак эди. Ёрдам қилиб юборин. Пулини бераман. Ўзим қашқадарёликман, "Пахтакор" мухлисиман... (Адҳамбек)

- Бўлди. Шу кишига битта либос совға қиламиз.

- Сиздан кейин одамлар сиз ҳақингизда қандай эслашларини истардингиз? (Бобур)

- Албатта, яхши инсон сифатида.

- Фарруҳ Сайфиев сотиб олинган ўйинларда қатнашганми?

- Бу нарса бўлмаган, бўлмайди ҳам. Ундан кўра футболни йиғиштириб қўйганим яхши.

- Ўзбек футболини тизимли қилиш учун нималар қилиш керак? Бу ҳақда турли функционерлар, журналистлардан эшитганмиз. Бироқ менга футболчининг фикри қизиқ. Чунки сизлар ҳар доим шу нарса билан тўқнаш келасизлар... (Аваз Ишмуҳамедов)

- Биринчи ўринда – ҳалоллик. Иккинчи ўринда чемпионатимизни кучайтиришимиз, яхши савиядаги футболчиларни олиб келишимиз керак.

- Самарқанд тизимида нимани ўзгартиришимиз керак?

- Самарқандда бўлганимда 4-5 та яхши майдон барпо қилардим. "Динамо"ни олсак, клубнинг машғулот майдони йўқ. Футболда майда камчилик бўлмайди. Ўсиб келаётган ёшларимизга аввало майдон қилиш лозим.

- Ўйин вақтида йўл қўйган хатонгиз сабаб стадиондаги мухлислардан келган эътирозларни қандай қабул қиласиз? (Тохир)

- Трибунадан бўладиган нарсаларга эътибор бермасликка, ўз ишимни қилишга ҳаракат қиламан.

- ЖЧ-2022 саралашининг сўнгги ҳал қилувчи раундида Вадим Абрамов нима учун сизни таркибга жалб қилмаганини ҳамон тушунмайман... (Акитнамор)

- Олиб кетмаганидан кейин 3-4та сайт ёзди. Кетишимиздан олдин "Бунёдкор" стадионида Туркманистон билан ўртоқлик учрашуви бўлганди. Ўйиндан кейин меҳмонхонага келиб, кечки овқатдан сўнг Карленович олдига чақириб, сен қоласан, деди. Кимни олиб кетишни мураббий ҳал қилади.

- "Динамо" ҳар йили охирги ўринларда юради. Про лигада бир йил, Суперлигада бир йил қатнашади. Жамоани мухлиси сифатида "Динамо"ни кучли бешликда юришини истайман... (Бекзод)

- Яхши савол. Фикримча, Самарқанддек шаҳарда яхши клуб бўлиши керак. Ҳар йили Про лигада, Суперлигага чиқади ва яна тушиб кетади. Тизим йўлга қўйилмаган, деб ўйлайман. "Динамо"ни мухлислари Наманганникидан қолишмайди.

- Футбол йўлидаги энг ёдда қоларли қийинчилик, оғир вазиятларни айтиб берсангиз... (Raskoln)

- Қийинчилик кўп бўлган. Сабр қилганмиз. Футболчи шундай паллада сабр қилса, нимагадир етишиши мумкин. 2007 йил "Машъал" академиясига борганимда, кўрикдан ўтганмиз. Оқсоқланиб юрганман. Шу оёқ билан 3 йил чидаган эканман. 2010 йил жарроҳлик амалиётини бошдан кечирдим. Тўрт йилдан сўнг яна бир жарроҳлик амалиётини бошдан ўтказдим.

Якунда футболчидан ўзига ёққан 7 та саволни кўрсатиб ўтиши сўралди. Ҳимоячи қуйидаги саволлар манзур келганини қайд этди.

1. ЖЧ-2022 саралашининг сўнгги ҳал қилувчи раундида Вадим Абрамов нима учун сизни таркибга жалб қилмаганини ҳамон тушунмайман... (Акитнамор)
2. Футбол йўлидаги энг ёдда қоларли қийинчилик, оғир вазиятларни айтиб берсангиз... (Raskoln)
3. Ака битта форма керак эди, ёрдам қиворинг, пулини бераман. Ака, ўзим қашқадарёликман, "Пахтакор" мухлисиман. (Adhambek)
4. Осиё Кубоги-2015 да ҳакам нега сизга сариқ карточка кўрсатганди? Сиз захира ўриндиғида эдингиз... (Роберто Баджо)
5. Мен бир неча бор машқлар жараёнидан келадиган видеолавҳаларни кўриб, сиз ва Элдор Суюнов орасида турли ҳазил, қизиқ воқеаларга гувоҳ бўламан. Элдор билан дўстлигингиз неча йиллардан бери давом этиб келади? (Эркин Ишмухамедов)
6. "Навбаҳор"га гол урадиган бўлсангиз Навбаҳор мухлислари олдида нишонлашга қўрқмайсизми? (8181)
7. Тасаввур қилинг: сиз фаолиятингиз сўнгида легионер сифатида Европанинг ўртамиёна жамоасида тўп тепяпсиз. Интервьюларингиздан бирида "Ўзбекистонга қайтсам, ярим мавсум ўйнайман ва шундан сўнг бутсаларимни михга иламан" дегансиз. Сизга 4 та клубдан таклиф тушди. Булар – ўзингиз туғилиб ўсган вилоятингиз жамоаси "Динамо", футболчи бўлишингизга катта ёрдам берган ""Машъал", Фарруҳ Сайфиев бўлиб танилишингизга сабабчи бўлган "Насаф" ҳамда юқори даражага чиқиб, легионер бўлишингизга хизмат қилган "Пахтакор". Чуқурроқ тасаввур қиламиз, биринчи даврадан кейин уларнинг очкоси деярли бир хил ва чемпионлик учун айнан шу клублар курашишмоқда. Сиз қайси бирини танлаган бўлардингиз? (Офлайн УЗБ Хажжи)

"Саволлар борми?" лойиҳасининг илк меҳмони Фарруҳ Сайфиев ўзидан ким кучли эканлигини айтиб ўтди