- O'yin haqida fikringiz?

- Qisqacha gapiradigan bo'lsam, o'yin nazorati to'liq biz tomonda bo'ldi. Raqib asosiy urg'uni himoyaga qaratdi. O'tgan tur OKMK bilan bahsda ko'p kuch yo'qotgandik, bugun bizga bor kuchni berib o'ynash etishmadi. Bunga issiq ob-havo ham o'z tasirini ko'rsatdi. Odatda bunday o'yinlarda bir yo ikkita imkoniyat bo'ladi va shundan foydalanish kerak. Baribir nima qilib bo'lsa-da, gol urishimiz kerak edi, afsuski to'p kirita olmadik.

- "Surxon" bugun yutuqqa harakat qildi, lekin gol urish uchun nima sababdan ikkinchi hujumchi maydonga tushirilmadi?

- Chunki hozir bizda ikkinchi hujumchi yo'q. O'yinchimiz bor, lekin formada emas. Balki ikkinchi davrada hammasi o'z ishiga tushar. Yoki yozgi tanaffusda boshqa hujumchi qidirishga to'g'ri keladi.

- "Surxon" grand jamoalar bilan yaxshi o'ynayapti, biroq o'rtamiyona klublarga kelganda qiynaladi. Nega shunday bo'lyapti?

- Futbol emociyalarga boy o'yin. Kuchli jamoalarga qarshi futbolchilar o'zlarini yaxshi tayyorlaydi. Kayfiyat ham yuqori bo'ladi. Lekin nima uchundir o'rtamiyona jamoalar bilan shu narsa ko'rinmayapti. Biz murabbiylar shtabi muammo nimada ekanini bilamiz va buni yo'qotish ustida ish olib boryapmiz.

- Raqib jamoa himoyaga asosiy urg'uni bergan paytda "Surxon" yoritib o'tishga qiynalyapti va qanotlardan to'p uzatish bilan cheklanib qolyapti.

- Bu o'rinda ko'p narsa futbolchilarning mahoratiga bog'liq. Ayniqsa o'rta chiziq vakillaridan katta kuch talab qiladi. Murabbiy faqat kerakli gapni aytishi mumkin, lekin raqib o'yinchisini aldab o'tish futbolchi vazifasi hisoblanadi. Jarima maydonchasi ichida qanday harakat qilish ham futbolchilarning o'ziga bog'liq.

Fevzi Davletov: "OKMK bilan bahsda ko'p kuch va emociya yo'qotdik, bu o'yinga kuchli ruhlana olmadik"