O'yin haqida

- Kutganimizdek, "Mashal" bugun maydonda ikkinchi raqam ostida harakat qildi. Raqib jarima maydonchasiga kirishga harakat qilgan holda, ko'p hujumlar qildik, ammo bizga birozgina agressivlik etishmadi. O'yindan keyin statistikaga qaradim: 12ta burchak zarbasi tepdik, 20ga yaqin raqib darvozasi tomon zarba berdik. Ammo, vaziyatdan foydalanish bobida oqsadik.

- O'zingiz aytganingizdek, juda ko'p burchak zarbalari ijro etdinglar. Ammo, jarima maydonchasida ulardan foydalanish uchun bo'ydor o'yinchilar etishmadimi?

- Bu borada ishlaymiz. Bugun aniqlik etishmadi. "Mashal" o'z harakati sabab bizga yaxshi hujumlarni amalga oshirishga to'sqinlik qildi. Ikkinchi qavatda o'ynay oladigan o'yinchilarimiz bor. "Mashal" ikkinchi bo'limda ham himoyaga etiborini qaratdi va biz uchun zonalarni yopib qo'ydi.

- "Surxon" "Navbahor" va "Andijon"ga qarshi yaxshi o'yin ko'rsatdi, ammo "Xorazm" va bugungi "Mashal"ga qarshi o'yinda ko'ngildagidek harakat qilmadi. O'yin tanlab tayyorgarlik ko'rilmoqdami?

- Har bir jamoaning o'z o'yin uslubi bor. To'liq himoyadan o'ynash va qarshi hujumlarga urg'u berish "Mashal"ga xos jihat bo'lsa kerak. Qarshi hujumlardan biri berilgan zarba yaxshiyamki darvoza ustuniga tegdi, aks holda hisobni tenglashtirish juda qiyin bo'lgan bo'lardi. Kuzda jamoalarning asl holatini ko'rib olamiz.

- "Surxon"da har o'yinda gol urish uchun yaxshi imkoniyatlar bo'lmoqda. Nega jamoada imkoniyatlar bo'lib turgan payti o'yindan kelib chiqib ikkita markaziy hujumchi bilan harakat qilishni tanlamaydi?

- Biz kerak bo'lsa uchta hujumchi bilan o'ynaymiz. Doston Tursunov ham hujumda o'ynashi mumkin, faqat biroz orqaroqda. O'tgan mavsumda ham bunday narsalarni sinab ko'rganmiz. Bunga asosan durang yoki mag'lubiyat holatida qo'l urganmiz. Abdug'ofur Haydarov hozircha to'liq o'ynashga tayyor emas. U o'z formasini tiklab olishi kerak, hozirda uning maydondagi vaqtlari 15-20 daqiqani tashkil qiladi. Vingerlar bugun o'z imkoniyatlaridan foydalanishi kerak edi. Asilbek Jumaev qanotdan markazga o'tgandi, ammo raqib buni bilgan holda unga qarshi chora ko'rdi.

- 29 aprelda O'zbekiston kubogi doirasida o'z uyida o'yin o'tkazadi. Shuningdek, 8 mayda Superliga doirasida "Paxtakor" Termizga keladi. Bu o'yin muxlislar uchun qanday o'tadi deb o'ylaysiz?

- Menimcha hamma keladi deb o'ylayman. Jamoamizning qanday o'yin ko'rsatishi Kubokdagi bahsga bog'liq. "Dinamo"ga qarshi o'yinni birinchi o'tkazib olaylik.

Fevzi Davletov: "12 ta burchak zarbasi ijro etdi, 20 ga yaqin zarbalar berdik, ammo vaziyatdan foydalanish borasida oqsadik"