Hammasi musobaqada jon saqlab qolish uchun kurashgan jamoalar o'rtasida sodir bo'ldi. 30-tur startiga qadar faqatgina 16-o'rindagi "Tambov"ning quyi divizion (MFL)ga tushib ketgani aniq bo'lib, yakuniy turda "Arsenal", "Ufa" yoki "Rotor" jamoalaridan biri pastga "sho'ng'ishi" kerak edi. Va bu Volgogradning "Rotor" klubi bo'ldi.

Xabaringiz bor, kelishilgan o'yinlarning oldini olish maqsadida futbol musobaqalarida jamoalarning turnir jadvalidagi yakuniy poziciyasini belgilab beradigan oxirgi tur o'yinlarining barchasi bir vaqtda o'tkaziladi. Bu qoida Rossiyada ham ishlaydi. RPLning 30-turidan o'rin olgan barcha uchrashuvlar Moskva vaqti bilan 14:00 da start olishi reja qilingandi. Ammo...

29-turdan keyin RPL turnir jadvalining quyi qismidagi holat shunday edi:

Oxirgi turda Tulaning "Arsenali" "Ufa" maydonida, "Rotor" esa Qozonda mehmon bo'lishi kerak. Guvohi bo'lganingizdek, vaziyat murakkab - uchchala klub ham quyi ligaga tushib ketishi mumkin:

Volgograd jamoasining "Rubin" ustidan qozonilgan g'alabasi uning musobaqada qolishini kafolatlardi. Shunda "Ufa"dan quyi divizionga tushib ketmaslik uchun "Arsenal"ni engishi talab qilinardi. "Rotor" "Rubin"ni engsa-yu, "Ufa" "Arsenal"dan ustun kelsa, tulaliklar kelasi mavsumni MFLda boshlashar edi.

Yuqorida aytganimizdek, 30-turning barcha o'yinlari Moskva vaqti bilan 14:00 da boshlanishi rejalashtirilgandi. Ammo "Ufa" va "Arsenal" o'rtasidagi uchrashuv starti biroz kechikdi. Aniqrog'i, mazkur o'yin "Rotor"ning o'yinidagi natija (1:1) aniq bo'lganidan keyin boshlandi. Volgogradliklar Qozonda "Rubin" bilan durang o'ynagach, "Arsenal"ning musobaqada qolishi oydinlashdi. Va muxlislarning fikricha, tulaliklar o'yinni xotirijam holatda "Ufa"ga "sotishdi" (2:1). Uchrashuv videolavhasini tomosha qilsangiz, ularning fikrida jon borligiga amin bo'lasiz.

1. "Ufa" jarima zarbasidan keyin hisobni ochdi. Bunda "Arsenal" himoyachilari standart amalga oshirilayotgan paytda jarima maydonchasi ichida paydo bo'lgan 2 nafar raqib himoyachisini ataylab bo'sh qoldirgandek...
2. Tulaliklar futbolchisi Maksim Belyaev o'z darvozasiga juda ishonarsiz avtogol urdi.
3. "Arsenal" vakili Gia Grigalava mutlaqo keraksiz vaziyatda to'psiz raqibining oyog'iga tepib, qizil kartochka ishlab oldi.

So'nggi tur bahslarining bir vaqtda boshlanmasligi sport principlari, UEFAning Fair Play principi va RPL reglamentiga zid. Xo'sh, unda Boshqirdistondagi o'yin starti nega kechikdi? Bunga sabab qilib, Ufa shahrida havo harorati 40 daraja issiqni tashkil qilayotgani ko'rsatildi. RPL reglamentida havo harorati 35 darajadan issiq bo'lsa, o'yin o'tkazish majburiy emasligi aytilgan ekan.

Endi tabiiy ravishda muxlislarda savollar tug'ilyapti. Ularga kimdir javob beradi yoki yo'q, endi ahamiyatsiz. Baribir "Rotor" yangi mavsumni quyi ligada boshlaydi. Ammo, bu voqea yana 10 yillar davomida yomon xotiralar bilan, fitna sifatida eslanishi aniq.

P.s.: Bugun "Rotor" bosh direktori Andrey Rekechinskiy yuristlar bilan maslahatlashib, ligani sudga berish haqida o'ylayotgani malum qilindi. Bu yog'i qiziq bo'ladi. Voqealar rivojini championat.asia'da kuzating.

Fitna. "Rotor"ni qanday qilib "o'ldirishdi"?