Ko'cha shevasida yozilgan ilk hangoma Iker Kasilyani "Real"dan ketishiga chiday olmay yurgan muxlislarga bag'ishlanadi.

- Nimaymish Ikr Kasillas degani "Real"dan ketibmish. Xuddi yaxshi ko'rgan qizi boshqa birovga erga tegib ketganday, uch kundan beri na bir tuzukroq ovqat eydi, na bir ish qiladi bu ahmoq. Vey, odam bilan bundoq ochilib gaplashmaydiyam-da. Erbag'irla-ab yotibdi. Ana Ergash qassobni kenjasiyam qishloqdan ketdi. Xech kim aza ochib yurgani yo'q, bunga o'xshab. Bo'lmasa shu bolayam to'pni yaxshi tepardi. Necha marta shuni orqasidan boshqa qishloqlarni yutib o'rtaga qo'yilgan pulmi, echki-uloqmi olib yurishuvdi. Mana endi bittayam go'l urolmay yutqizib yuribdiymish go'llar. Shu bolaniyam xotini chatoq chiqdimi deyman-da, kelin bo'lib tushganiga ikki yil bo'lmay eriniyam olib shaxarga jo'navorishdi. Qishloqda yashashmasmish.

Vey, shaxaringda pishirib qo'yibdimi, yuraver otangni davlatini soyasida eb-ichib, tayyor uying bo'lsa, desam, "E, ota sig'ishtirishmayabdi-da, xotingayam kun berishmayabdi" deydi. Kim bilsin o'sha Ikr Kasillas deganniyam sig'ishtirishmagan bo'lsa ketgan chiqar. Shu desang jiyan oldingga kelganim boisi, gap bor. Mana sen psixlarni do'xtirisan-a?

-Tog'a men psixologman, psix do'xtirmas, dedim so'rida o'tirgan tog'amning gaplarini zavklanib tinglarkanman.

-Vey, siz o'qiganlar dono-yu, biz bir avom qishlaqimiz-da a? Ana o'zing aytib turibsan psixologman deb, demak psixlarni davolay olasan. Bizni shu arzanda erkatoyniyam tuzatib bermasang bo'lmaydi.

- Tavba deng-ey tog'a, o'g'lingiz soppa-sog'ku.

- Sog'amas-da bu sog'amas, sog' bo'lganda Ronoldo'ni sevaman dermidi, ovsar. Men o'ylabman bironta chet ellik ashulachi qizdir-da deb, keyin bilsam erkak kishi ekan u. Mana, kecha ertalab "tur o'rningdan, mollarni yaylovga xayda" desam, "ota, boshim og'rib, ko'zimni ocholmayabman" deydi. Uzzu-kun telponga qaragandan keyin kaneshna ochilmaydi-da bu ko'z jonivoram, miyang ham suyulib achigan qatiqdan battar bijg'ib ketgandir-ov, dedim. Bir payt chala-yarim choyini ichib chiqib ketdi, ishtaxayam ketgan. Bir soatlar o'tdimikin bir yarim soatlarmi bir payt eshak yomon bezovta xangrab qoldi-da, obbo yana Eshmatni eshagi keldi-yov buni yoniga deb chiqsam mollar xaliyam joyida turibdi, o'zi eshakni ustiga o'tirvolgan, yoniga bordimam-ki telpondan kalla ko'taray demaydi. Vey bola, dedim, eshakmiya desam eshak ham sendan aqlli ekan, qara xangrashini, ketdik yaylovga deyabdi, xayda tezroq, qorin och, sen choy-poy ichib chiqqandursan biz xali zavtrak qilmadik deyabdi, dedim. Shundayam ko'chaga chiqib yana telponga qaraydi-ya. Yaxshiyam bu eshak minadi agar moshina minsa bormi. Yoshligimda moskvichimda yarim kecha kelsam otam raxmatli xavotir olib uxlamay o'tirardi. Bu kuppa-kunduz kuni valasapid minib chiqsa xavotir olaman-da. Ayniqsa quloqqa tiqadigan navushnik degani yomon ekan. Bir gal sal qopdi Shokirni kamazini tagiga kirib ketishiga, bir Xudo asrabdi-da. Shundan keyin o'sha navushnikiniyam uzib tashladim, telponniyam sindirib tashladim. Ikki kun yomon o'rtandi bola. Vey, alkash aroqni bangi nashasini tashlagandayam xumoridan bunaqa qiynalmagan bo'lsa kerak. O'zimam besh yil oldin nosni tashlaganimda bir xafta boshim og'rib jazavaga tushdim, lekin bunaqasini ko'rmagandim.

-Ikki kundan keyin nima bo'ldi? dedim qiziqib.

-Nima bo'lardi, qay go'rdandir yana telpon topib oldi-da.

Hamsoyam Maruf malim aytdiki bunaqa qilib telpondan qutolmaydi u, uni miyasini davolash kerak, ruxiyatini davolash kerak, dedi. Miyasini do'xtirga davolatarman, ruxiyatini kim davolaydi, kinnachilarga kinna soldiramanmi, desam, ana jiyaningiz psixolog o'shanga ko'rsating dedi. Shunga oldingga keldim-da jiyan. -Ex-xe, gap jiddiy deng tog'a. Men bo'lsam xar doimgi gurungi-da bu chapani tog'amning deb tirjayib eshitib o'tiribman. Albatta davolaymiz. Shu bugunoq boshlaymiz davolashni, deya tog'amga ergashib qishloqqa yo'l oldim.

FK Davr

"FK Davr"dan Bir shingil hangoma. Kasillas "Real"dan ketibmish...