O'yinda "Nasaf" 1:0 hisobida g'alaba qozonib, Kubokning yarim finaliga yo'l oldi. Bilasiz, oxirgi paytlarda qarshiliklar bosh murabbiyi atrofida ko'p gap-so'zlar bo'ldi. Ro'ziqul Berdiev diskvalifikaciya sabab kechagi bahsni texnik hududda kuzata olmadi.

Kechagi o'yindan oldin va uchrashuv davomida ko'pchilik muxlislar jo'r bo'lib Berdievni qo'llab-quvvatlovchi so'zlar aytishdi. Bundan ishqibozlar murabbiyni qanchalik hurmat qilishini tezda tushunib olsa bo'ladi.

Hatto muxlislardan biri Ro'ziqul Berdievni afsonaviy murabbiy Ser Aleks Fergyusonga qiyoslab banner ko'tardi. Bannerda Beriev va Fergyuson surati yonma-yon qo'yilgan bo'lib, har ikkala ikkala mutaxassisga "Ser" etirofi berilgan. Qolaversa, Berdievga nisbatan "Yagona, tengsiz murabbiy" deyilgan.

Yaxshi bilasiz, shotlandiyalik murabbiy Aleks Fergyuson "Manchester Yunayted"dagi faoliyati orqali "Ser" unvoniga sazovor bo'lgan. Bizda bunday unvon yo'q, ammo hukumat rahbari tomonidan beriladigan "O'zbekistonda xizmat ko'rsatgan murabbiy" unvonini Ro'ziqul Berdiev qabul qilib olgan.

Malumot uchun, Ser Aleks Fergyuson 1986-2013 yillar oralig'ida MYUni boshqarib, 13 bor chempionlikni nishonlagan. Shuningdek, 5 marta Angliya Kubogi, 10 marta Angliya Superkubogi, 2 bor Evropa chempionlar Ligasi, bir martadan UEFA Superkubogi, Klublar o'rtasidagi jahon chempioni va boshqa turli sovrinlarni qo'lga kiritgan.

Ro'ziqul Berdiev esa "Nasaf"dagi 10 yillik faoliyati mobaynida 4 bor O'zbekiston chempionati bronza medallarga sazovor chiqqan, bundan tashqari, 2 bor kumush medal, 2 bor O'zbekiston Kubogi va 1 marta Superkubokni qo'lga kiritgan. Ro'ziqul Berdiev 5 marta O'zbekistonning "Eng yaxshi murabbiyi" deb topilgan.

Berdiev hisobida faqat chempionlik medali yo'q, xolos. Lekin "Nasaf" bu mavsum chempion bo'lishga juda yaqin turibdi.

Fotofakt. Qarshilik muxlis Ro'ziqul Berdievni afsonaviy murabbiyga o'xshatdi