O'yin haqidagi maqolani etiboringizga havola etgan edik. Bugun esa akademiya haqida so'z yuritmoqchimiz.

“Aspire” akademiyasi Qatar poytaxti Dohaning Al-Vaab tumanida joylashgan, umumiy maydoni 250 gektarni tashkil qiladi. Dunyodagi eng katta va eng boy ushbu akademiya bor yo'g'i 20 oyda qurib bitkazilgan. Qurilish jarayonida ettita qurilish kompaniyasi 24 soat ishlagan.

Akademiyada 14 ta futbol maydoni, 40 ga yaqin turli sport turlariga mo'ljallangan maydonlar mavjud. Ko'plab sport turlari bilan shug'ullanish uchun sharoitlar yaratilgan bo'lishiga qaramay akademiyaning o'zi asosan futbol, engil atletika, stol tennisi, suzish, gimnastika va qilichbozlik sport turlariga yo'naltirilgan. Akademiyada Olimpiada o'yinlari talabiga javob beradigan suv havzasi ham bor. Akademiya hududida sport laborotoriyasi ham faoliyat yuritadi.

Bu erda dunyoning turli mamlakatlaridan 100 dan ortiq murabbiylar yoshlar uchun mashg'ulot o'tkazishadi. Har bir sport turiga qarab murabbiy olib kelingan. Misol uchun stol tennisi uchun Xitoy va Singapurdan, futbol uchun Gollandiyadan murabbiylar olib kelingan.

Akademiyadagi bolalarni ruhlantirish, ulardagi g'oliblikka bo'lgan intilishni oshirish maqsadida mashhur jamoalarning aynan shu erda yig'in o'tkazishiga qulay sharoitlar yaratib berilgan. Bu erda yaqindagina Germaniyaning “Bavariya”si yig'in o'tkazib ketgan bo'lsa, ayni paytda Rossiyaning “Zenit” jamoasi mashg'ulotlar va o'rtoqlik o'yinlari o'tkazmoqda. Fevral oyida Ispaniyaning “Barselona” klubi ham “Aspire”da yig'in o'tkazadi.

Umuman olganda Doha Evropaning “yirik” jamoalari yig'in o'tkazishi uchun ideal joy. Yaxshi sharoit, qulay ob-havo, muxlislardan holi maskan. Albatta, o'zbekistonlik muxlislar nazorat o'yinida ham ajoyib tarzda har ikki jamoani qo'llab turish mumkinligini ko'rsatib berishdi.

“Aspire” akademiyasi bilan to'liq tanishib chiqish uchun bir kun sarflashga to'g'ri keladi, afsuski bizda bunday imkoniyat bo'lmadi. Akademiyaning yaqinida mehmonxona ham bor, yig'in o'tkazish uchun kelgan jamoalar o'sha mehmonxonaga joylashadilar.

VIDEO

TAS-IX emas

Mashg'ulot paytida ham barcha xizmatlar yo'lga qo'yilgan, hammasi alo darajada. Sportchilardan faqat shug'ullanish talab etiladi xolos.
Bu futbol javohiri bo'lgan “Aspire” akademiyasi haqida sizga ilinganlarimiz edi.

Tolibjon Qosimov
Doha, Qatar

Futbol javohiri - “Aspire”