11-iyun kuni futzal bo'yicha O'zbekiston chempionatining 2022/23-yilgi mavsumiga yakun yasaladi. So'nggi tur bellashuvlariga poytaxt Toshkent mezbonlik qiladi.

May oyi so'ngida O'zbekiston kubogining saralash uchrashuvlari bo'lib o'tadi. 3-4 iyun sanalariga 1/8 hamda 1/4 final bosqichi uchrashuvlari rejalashtirilgan bo'lib, 17-18 iyunda yarim final hamda final bellashuvlari o'tkaziladi.

O'zbekiston kubogida Oliy liganing 12 ta, Birinchi liganing 7 ta jamoasi qatorida 3 ta havaskor jamoalar ham o'z omadini sinab ko'radi. Liga taqdim etilgan arizalardan kelib chiqib, DHL, “Ermak” hamda “O'zSQB” jamoalarini musobaqaga qo'shishga qaror qildi. Mazkur uch jamoa, shuningdek, Birinchi liganing so'nggi 5 jamoasi O'zbekiston kubogiga saralash bellashuvlari orqali qo'shiladi. Bular: “Dizak”, “Qizilqum”, “Qang'li”, “Surxon”, “Mashal”.

Saralashda 8 jamoa ikki zonaga ajratib olinadi. Geografik holatidan kelib chiqib, DHL, “Ermak” hamda “O'zSQB” saralashni Toshkentda o'tkazadi. “Surxon”, “Mashal” va “Qizilqum” esa Qarshiga keladi. Jizzaxning “Qang'li” va “Dizak” jamoalari qura orqali mazkur ikki guruhga ajratiladi. Har bir guruh jamoalari uch kun davomida o'zaro bir martadan zalga chiqadi. Yakunda guruh g'oliblari O'zbekiston kubogining 1/8 final bosqichiga yo'l oladi. Mazkur bosqichdan boshlab jamoalar olimpiya tizimida navbatdagi bosqichga yo'l oladi yoki musobaqa bilan xayrlashadi.

O'zbekiston kubogiga 25-may sanasi 18:00 da qura tashlanadi.

Futzal. DHL, Ermak hamda SQB O'zbekiston kubogida ishtirok etadi