“Ardus” esa ketma-ket ikki yil O'zbekiston kubogini qo'lga kiritdi. “Ardus” va O'zbekiston terma jamoasi azosi Dilshod Rahmatov o'tgan mavsumning eng yaxshi futzalisi deb tan olindi. Biz Rahmatov bilan bog'lanib undan intervyu oldik.

- Yakuniga etgan mavsum haqida fikrlaringiz. Oliy liga guruh bosqichida qanday qiyinchiliklar bo'ldi?
- Mavsum yomon o'tmadi deb o'ylayman. “Ardus” mavsumni Associaciya kubogini yutish bilan boshladi. Keyinchalik O'zbekiston kubogini ham qo'lga kiritdik. Guruh bosqichiga kelganda qiyinchiliklar bo'ldi. Ayniqsa “Do'stlik AIN” bilan bo'lgan dastlabki ikki uchrashuv juda qiyin o'tdi. Bu ikki bahsda himoyadagi qo'pol xatolar tufayli ulardan 9ta gol o'tkazib yubordik. So'nggi hal qiluvchi o'yindagina o'zimizga keldik va 7:2 hisobida g'alaba qozondik.

- “Ardus” kubok finalida “Olmaliq”ni mag'lub etdi. Mana shu uchta final haqida...
- Kubok finalida “Olmaliq”ning xatolaridan foydalandik. Menimcha ularda charchoq alomatlari sezildi. Sababi men bu jamoa bundan ham yaxshiroq o'ynay olishiga ishonaman. Finalda taktikamizni biroz o'zgartirdik. Xose Mariya Mendez himoyaviy o'yin uslubini tanladi va adashmadi deb o'ylayman. Shu bois qarshi hujum va standart vaziyatlardan foydalandik.

- Chempionat finalida esa omad “Olmaliq”qa kulib boqdi. Nima sababli Ardus mag'lub bo'ldi deb o'ylaysiz?
- Chempionat finalida ham xuddi Kubok o'yinida bo'lgani kabi himoyaviy o'yin tashkil qildik. Bu birinchi o'yinda o'z samarasini berdi va 3:0 hisobida g'alaba qozondik.

Ikkinchi uchrashuvda himoyadagi xatolarimiz evaziga gol o'tkazib yubordik va oldinga intildik. “Olmaliq” esa qarshi hujumdan foydalandi va gollar urdi. To'g'risi “Olmaliq” bilan o'yin uslubimiz standart vaziyatlarimiz bir xil edi. Faqat raqib bizga qaraganda g'alabaga ko'proq intildi. Yigitlarning ko'zi yonib turgandi. Bir so'z bilan aytganda ularda g'alabaga bo'lgan xohish biznikidan kuchli edi. “Olmaliq”ni chempionlik bilan tabriklayman va Osiyo chempionlar ligasida jamoaga omad tilayman. Ular O'zbekiston sharafini munosib himoya qilishadi deb o'ylayman.

- Mavsumning eng yaxshi futzalchisi bo'ldingiz. Bu nomga yana kimlar loyiq edi deb o'ylaysiz?
- To'g'risi mavsumning eng yaxshi fuzalchisi sovrinini olaman deb umuman kutmagandim. Eng asosiysi jamoamning g'alabasi edi. Bu nomga chempionatimizdagi hamma futzalchilar loyig' edi deb o'ylayman. Fursatdan foydalanib jamoadoshlarimga va muxlislarimizga rahmat etaman. Futzal jamoaviy o'yin, sheriklarim bo'lmaganida bu sovringa ega bo'lmasdim. Shu bois yutuq butun jamoaniki.

- Shaxsan siz uchun mavsumning eng qiyin o'yini qaysi bo'ldi?
- Chempionat va Kubok bahslarida juda ko'p o'yinlar qiyin o'tdi. Har bir jamoa o'zini ko'rsatishga va g'alaba qozonishga intildi. Shaxsan men uchun guruh bosqichida “Do'stlik AIN” bilan bo'lgan uchrashuv eng qiyini bo'ldi. Qarshi klubi bir necha yildan buyon bizga qarshi juda yaxshi o'ynab keladi.

- Chempionatda qaysi yosh futbolchilar kashifyot bo'lishdi?
- Chempionatimizda yosh futzalchilar juda ko'p. Yildan yilga yosh futzalchilar ko'payib bormoqda. Bundan xursandman, chunki milliy terma jamoa kelajagi aynan shu yoshlar hisoblanadi. Alohida yoshlarni aytib o'ta olmayman. Lekin menga “Bunyodkor” jamoasining o'yinlari yoqdi. Sababi jamoa deyarli yosh futzalchiladan tashkil topgan. Ular mavsumni 4-o'rinda yakunlashdi. Bu yomon natija emas deb o'ylayman. Keyingi yil mana shu yoshlar yanada ishonchli o'ynashlariga ishonaman.

- Fevral oyidagi Osiyo chempionatini hali unutmagan bo'lsangiz kerak...
- Buni unutib bo'larkanmi (kuladi). Osiyo chempionati O'zbekistonda o'tganidan xursandman. Muxlislarimiz bizni ajoyib tarzda qo'llab turishdi. Ularga yana bir bor kattakon rahmat aytmoqchiman. Biz o'z uyimizda Jahon chempionatiga chiqishni judayam xohladik va maqsadimizga erishdik. O'zbekiston terma jamoasining kuchi bu birdamlikda. Albatta muxlislarning o'rni ham juda katta. Jahon chempionatida ishtirok etishimizdan xursandman.

- Jahon chempionatiga tayyorgarlik qanday kechadi?
- O'zbekistonda mavsum yaqinda yakunlandi. Hozir qisqa muddatli tatildamiz. Iyun oyidan yig'in boshlanadi. Menimcha kuchli terma jamolar bilan o'rtoqlik uchrashuvlari bo'ladi. Jahon chempionatiga qadar Osiyo, Evropa qitasining eng kuchli jamoalari bilan o'yinlarda o'zimizni sinab ko'rsak kerak. Jahon chempionatida munosib ishtirok etishga harakat qilamiz va bor kuchimiz bilan o'ynaymiz.

Narzulla Saydullaev

Futzal. Dilshod Rahmatov: “Jahon chempionatida munosib ishtirok etishga harakat qilamiz”