Унда тарихда биринчи маротаба Ўзбекистон терма жамоаси ҳам қатнашади. Бугундан бошлаб шу кунга қадар ўтказилган барча мундиаллар ҳақида маълумотларни эътиборингизга ҳавола этишда давом этамиз.

ЖЧ-2008

Мини футбол бўйича олтинчи Жаҳон чемпионати Бразилияда ўтказилган. Унда мезбонлар ўзларининг тўртинчи чемпионликларини нишонлашган.

Пауло де Оливейра бошчилигидаги Бразилия ўз майдонида ўтган мусобақада барча рақибларини тор-мор келтиришади. Биринчи ва иккинчи босқичнинг 7 ўйинида рақиблар дарвозасига 58та тўп киритиб, ўз дарвозаларидан бор йўғи 4 бор тўп олиб чиқишади.

Финалда эса чарм тўп "сеҳргарлари" ўзларининг азалий рақиблари Испанияга қарши кураш олиб боришади. Бу Фалкао жамоадошлари асосий вақтда юта олмаган ягона ўйинга айланади. 6 метрлик масофадан пенальтилар сериясида эса 10 мингдан зиёд мухлис қаршисида Бразилия аввалги икки мундиалдаги мағлубиятлар учун ўч олади - 4:3, Жаҳон кубоги Бразилияда қолади.

Шахсий совринларнинг деярли барчасини бразилияликлар йиғиштириб олишди. Фақатгина мусобақа тўпурари номи асли бразилиялик бўлган Россия терма жамоаси аъзоси Пулига насиб этади (16 гол). Фалкао эса 15та гол билан иккинчи бўлади. Лекин, Фалкао мундиалнинг энг яхши футзалчиси дея эътироф этилади.

Ушбу мусобақанинг яна бир эътиборга молик жиҳати Осиё футзалининг афсонаси Эрон терма жамоаси аъзоси Воҳид Шамсаи чемпионатда ўз ўйини билан барчанинг диққатини тортади ва Жаҳон чемпионатининг энг кучли 10 футзалчиси сафига киритилади. Унинг жамоадоши Мустафа Назари эса бразилиялик Тиагодан кейин мундиалнинг энг яхши дарвозабони номинациясида иккинчи поғонадан жой олади.

ЖЧ-2008, Финал
19.10.2008, "Гинасио Мараканазинью" спорт саройи
Бош ҳакам: Фабиан Лопез (Колумбия)
Мухлислар: 10082

Бразилия - Испания 2:2 (пен. 4:3)
Голлар: Маркиньо 24, Винисиус 36 - Торрас 27, Альваро 38

Бразилия (биринчи бешлик): Тиаго, Габриэль, Шумахер, Ленисио, Маркиньо.
Захира: Франклин, Рожерио, Ари, Кико, Винисиус, Ветао, Фалкао, Вилде, Карлиньос.

Испания (биринчи бешлик): Амадо, Эсеверри, Хави Родригес, Кике, Марсело.
Захира: Хуанхо, Кристиан, Ортиз, Торрас, Фернандао, Алваро, Андреу, Борха, Даниэль.

Огоҳлантиришлар: Франклин 7, Шумахер 17 - Х.Родригес 11

Видео

ЖЧ-2008 финали, TAS-IX эмас

Футзал бўйича Жаҳон чемпионати-2008
Ўтказилган жойи: Бразилия
Ўтказилган шаҳарлар: 2 (Рио-де-Жанейро, Бразилиа)
Ўтказилган санаси: 30 сентябрь - 19 октябрь, 2008 йил
Иштирокчилар: 20 (6 қитъадан)
Мухлислар ташрифи: 292161 (ҳар ўйинга 5217)
Урилган голлар: 387 (ҳар ўйинга 6.91та гол)
Тўпурар: Пула (Россия, 16та гол)
Энг яхши ўйинчи: Фалкао (Бразилия)
Энг яхши дарвозабон: Тиаго (Бразилия)
"Fair-Play" соврини: Испания

Совриндорлар
Чемпион - Бразилия
Иккинчи ўрин - Испания
Учинчи ўрин - Италия
Тўртинчи ўрин - Россия

Толибжон Қосимов

Футзал. Мундиаллар тарихи. ЖЧ-2008. "Қиролнинг қайтиши"