To'rtinchi kungi natijalar

Abdujabbor G'afforov ("Maksam-Chirchiq" futzal jamoasi bosh murabbiyi):

- Birinchi bo'limda yaxshi o'yin ko'rsatdik. Ikkinchi bo'limda esa o'yin tempi pasaydi. Vaziyatlardan unumli foydalana olmadik. Bizning jamoaga omad ko'proq kulib boqdi.
Shogirdlarim bir qismining sog'lig'i joyida emas, Javlon Anorov grippga chalingani uchun bugun maydonga tushmadi. Bu turda ushbu futbolchilar safga qayta olishmaydi. Shunga qaramasdan, kurashishda davom etamiz.

Farruh Zokirov ("Neftchi" futzal jamoasi bosh murabbiyi):

- Birinchi kun o'yinimiz juda yaxshi shakllangan Maksam-Chirchiqga qarshi o'tdi. O'yinga yaxshi tayyorgarlik ko'rgan edik. Vaziyatlardan foydalana olmaganimiz tufayli birinchi bo'limda raqibimiz foydasiga yirik hisob qayd etildi.
Jamoada ikki futzalchi jarohati sababli Olmaliqqa kela olmadi. Biz Olmaliqqa kecha etib keldik. Dam olish uchun etarlicha vaqt bo'lgan.
Oldinda yana ikkita o'yin bor. Ularda ochko olishga harakat qilamiz.

Ravshan Rajabov ("Metallurg" futzal jamoasi bosh murabbiyi):

- Yigitlar bugun chiroyli o'yi namoyish qilishdi. Ayniqsa, Akmal Hazratqulovni alohida takidlagan bo'lar edim. Darvozabon - yarim jamoa deyishadi. Akmal bugun jamoaning 90 foizini tashkil etdi, deyish mumkin.
O'tgan bellashuvlarda o'z imkoniyatlarimizdan unumli foydalana olmaganimiz sabab ko'plab ochkolarni boy berdik. Jamoamiz endi shakllanib bormoqda. Tarkibdagi 70-80% futzalchilarimiz jamoaga endi kelib qo'shilishgan. Turdan turga o'yinimizni rivojlantirib borishga harakat qilamiz.

Bahodir Ahmedov (HUAXIN-JIZZAX bosh murabbiyi):

- Shogirdlarim bugun o'z o'yinini namoyish eta olishmadi, aksincha, juda yomon harakat qilishdi. Vaziyatlardan foydalanishda, qarshi hujumlarni nihoyasiga etkazishda, tashabbusni o'z qo'llariga olishda ko'plab xatoliklarga yo'l qo'yishdi.
Raqiblarimiz esa aksincha, juda tartibli o'yin ko'rsatishdi, ularni tabriklayman. Bugungi mag'lubiyatimiz ikkinchi yo'qotish bo'ldi, chempionat yakunida biz uchun qimmatga tushishi xavfi bor. Maqsadimiz faqat bosh sovrin ekan bundan keyin birorta ham ochko yo'qotishga haqqimiz yo'q.

Xurshid Tojiboev ("Navbahor" futzal jamoasi bosh murabbiyi):

- "Bunyodkor" yosh tarkibga ega ekanligiga qaramasdan yaxshi o'yin ko'rsatdi. Uchrashuv avvalida o'tkazib yuborilgan gollar bizga ruhan tasir ko'rsatdi. Hisobni tenglashtirish maqsadida raqib darvozasi oldida ko'plab xavfli vaziyatlarni yuzaga keltirdik, ammo ulardan foydalana olmadik.
Ilhom Yusufjonov, G'ulom Mamajonov kabi etakchilarsiz harakat qildik. Ular biroz betob ekanliklari bois jamoamizga yordam bera olishmadi. Albatta, ularning o'rni maydonda yaqqol sezildi.

Abdulla Bo'riev ("Bunyodkor" futzal jamoasi bosh murabbiyi):

- Bugun turnir jadvalida yonma-yon ketayotgan ikki jamoa o'zaro to'qnash keldi. Shu bois, uchrashuv qiyin o'tishini oldindan bilar edik. Yigitlarning ruhiyati ko'tarilishi uchun turning ilk bahsidagi g'alaba juda ham zarur edi.
Biz uchun eng og'ir tur aynan 3-tur bo'ladi. Boisi, har uchchala raqib bilan musobaqa jadvalida yonma-yon ketyapmiz. "Maksam-Chirchiq" ham, "Metallurg" ham bugun g'alaba qozondi. Meni xursand qilgani, jamoamiz darvozasi daxlsizligini saqlab qoldik. Bundan oldingi bellashuvlarda muntazam tarzda o'z darvozamizdan to'p olib chiqayotgan edik.

Futzal. Oliy liganing to'rtinchi kungi bahslaridan so'ng murabbiylar qanday fikrda?