Sanae Giti Pasand klubi tashkil etilganiga ko'p bo'lmagan. 2010 yilda tuzilgan jamoa o'tgan qisqa davr mobaynida bir marta (2012/2013 yilgi mavsum yakuniga ko'ra) Eron chempionligini, 2010/2011 va 2011/2012 yilgi mavsumlarda esa vice-chempionlikni qo'lga kiritgan. 2012 yilgi klublar o'rtasidagi Osiyo chempionatida esa jamoa o'z bayrog'ini butun qita bo'ylab hilpiratgan bo'lsa, oradan bir yil o'tib faqat finalda imkoniyatni boy berdi.

Jamoa tarkibidagi o'yinchilar haqida ular qo'lga kiritgan jamoaviy yutuqlardan tashqari, individual natijalar ham darak beradi: Muhammad Keshavarz 2011 yilgi Osiyoning eng yaxshi futzalchisi, 2012 yilgi klublar o'rtasidagi Osiyo chempionatining eng foydali o'yinchisi, 2012 yilgi futzal bo'yicha jahon chempionatida Eron terma jamoasi sardori; Ahmad Ismoilpur 2012/2013 yilgi mavsum Eron chempionati va 2012 yilgi klublar o'rtasidagi Osiyo chempionati eng yaxshi to'purari. Klubning qator futbolchilari, Muhammad Keshavarz va Ahmad Ismoilpurdan tashqari, Afshin Kozimiy va Husayn Toyibiy 2012 yilgi jahon chempionati bahslarida ishtirok etgan.

O'zbekistonga 25 oktyabr kuni etib kelgan Sanae Giti Pasand o'yinchilari 26 oktyabr kuni ilk nazorat o'yinini Bunyodkorga qarshi o'tkazib, 11:1 hisobida g'alaba qozonishdi. 28 oktyabr kuni esa O'zbekiston futzal terma jamoasiga qarshi dastlabki nazorat o'yini o'tkazildi va qiziqarli kechgan bahs 2:3 hisobida O'zbekiston futzal terma jamoasi mag'lubiyati bilan yakuniga etgan edi. 5-7 noyabr kunlari Toshkentda o'tkaziladigan Osiyo chempionati-2014 saralash bahslariga tayyorgarlik ko'rayotgan O'zbekiston futzal terma jamoasi ikkinchi uchrashuvda asosan yosh nomzodlarni sinab ko'rdi. Nisbatan kuchli raqibga qarshi uchrashuvda ushbu qaror o'zini ko'p ham oqlamadi.

Uchrashuvda hisob 3-daqiqada Osiyoning 2011 yildagi eng yaxshi futzalchisi – Muhammad Keshavarz tomonidan ochildi. Oradan ikki daqiqa o'tar-o'tmas, Said Toqizodaning markazdan yo'llagan zarbaga o'xshamagan zarbasi Javlon Anorovning oyog'idan To'ychi Berdiev darvozasiga borib tushdi. Oradan yana bir daqiqa o'tib klublar o'rtasidagi 2012 yilgi Osiyo chempionati to'purari O'zbekiston futzal terma jamoasi darvozasiga uchinchi golni urdi.

O'zbekistonlik futzalchilar o'yin boshidayoq uchta gol o'tkazib yuborganliklariga qaramay, umuman olganda, butun birinchi bo'lim davomida raqibga qarshi tengma-teng o'yin namoyish etishdi. Sepahr Muhammadiy darvozasi oldida qator xavfli vaziyatlar sodir etildi, biroq o'zbekistonlik futzalchilarga bazi vaziyatlarda aniqlik, bazilarida sovuqqonlik, yana boshqasida esa birozgina tezkorlik etishmadi.

Taym boshi kabi, uning so'nggi to'rt daqiqasi ham gollarga boy bo'ldi. Dastlab, 16-daqiqada Sanae Giti Pasandning yana bir chiroyli kombinaciyasini Ahmad Ismoilpur bilyard sharini luzaga tushirgandek yakunlagan bo'lsa, 18-daqiqada Mahdi Javid O'zbekiston futzal terma jamoasi darvozasiga beshinchi golni urdi. Bu vaziyatda O'zbekiston termasi etakchilaridan biri Dilshod Rahmatov himoyada qo'pol xatoga yo'l qo'yib, to'pni raqibiga oldirib qo'ydi.

Bahodir Ahmedov shogirdlari faqat taym so'ngida hisobni qisqartirishga muvaffaq bo'lishdi. Maydonga Muhammad Keshavarzni darvozabon o'rniga beshinchi o'yinchi sifatida tushirilganidan foydalangan Javlon Anorov, raqib hujumi vaqtida to'pni egallab olib, tezkorlik bilan Sanae Giti Pasandning bo'sh qolgan darvozasini aniq nishonga oldi. Shuningdek, taym oxirida Kogondan chaqirilgan darvozabon To'ychi Berdiev ham Eron chempionining darvozasiga gol urganlar qatoriga o'z nomini yozib qo'yishi mumkin edi, biroq uning zarbasi darvoza to'sini ustidan o'tib ketdi.

Ikkinchi taymni O'zbekiston futzal terma jamoasi ishonchli boshladi. Dastlab Muhammad Keshavarz ikki marta Berdiev darvozasini nishonga olishga harakat qilganiga qaramay, 22-daqiqada Davron Chorievning yo'llagan zarbasi hammasidan xavfliroq chiqdi – to'p himoyachilar va darvozabondan ham o'tib, ustunga tegib qaytdi. Eron klubi darvozasi oldida yuzaga kelgan keyingi xavfli vaziyatda esa Sepahr Muhammadiy o'zini ko'rsatib, to'pni egallab oldi. Keyingi daqiqalar davomida Artur Yunusov, Maqsud Fayzullaev, Aleksandr Kartauzov, Javlon Anorov, shuningdek, Artur Yunusov bilan birgalikda ajoyib kombinaciya tashkil etgan Dilshod Rahmatovning zarbalari yo'liga Muhammadiy to'g'anoq bo'ldi. Aksincha, Sanae Giti Pasandning beshta qarshi hujumi muvafaqiyatli yakuniga etdi.

Nazorat uchrashuvi
29 oktyabr, seshanba
O'zbekiston – Sanae Giti Pasand (Eron) 1:10 (1:5)
Gollar: Javlon Anorov (19) – Muhammad Keshavarz (3), Said Toqizoda (5), Ahmad Ismoilpur (6, 16), Mahdi Javid (18, 37), Sajad Bandi Sadiy (27, 39), Muhammad Tohiriy (28), Majid Tikdarinajod (33).

Futzal. O'zbekiston – Sanae Giti Pasand - 1:10