Yaponiya - Vetnam bosh murabbiylari o'z fikrlarini bildirishdi.

Bruno Garsiya (Vetnam bosh murabbiyi): Ertaga Vetnam terma jamoasini qiyin o'yin kutib turibdi. Yaponiya oxirgi ikki Osiyo chempionatida chempion bo'lgan. Shuning o'zi ham raqib haqida barchasini aytib turibdi.

- Yaponiyaga qarshi o'yindan oldin shogirdlaringizni qanday ruhlantira olasiz?
Bruno Garsiya: - Yaponiya so'zsiz favorit. Ertangi o'yinda kuchli jamoaga qarshi o'ynaymiz. Ammo har bir jamoaning kuchli va kuchiz tomonlari bo'ladi. Biz yaponlarning kuchsiz tomonlarini topishga harakat qilamiz.

- Ertangi o'yindan oldin yo'qotishlar bormi?
Bruno Garsiya: - Jamoamizda jarohat olgan futzalchilar bor. Ular Tailand bilan o'yinda maydonga tusha olishmadi. Agar ertagacha tuzalishmasa qolgan futzalchilar bilan o'ynamiz.

- Yaponiya murabbiyi matbuot anjumaniga kelmadi. Bunga munosabatingiz...
Bruno Garsiya: - Buni bilmayman. Balki u yo'ldadir, balki matbuot anjumani kechroq boshlanadi deb o'ylagandir. Boshqa sabab ko'rmayapman.

- Vetnamning “Tay Son Nam” klubi haqida malumot bersangiz.
Bruno Garsiya: - Bu klub Osiyoda eng kuchlilardan biri, Vetnamda esa u birinchi raqamli klub hisoblanadi. Ligada ishonch bilan etakchilik qilmoqda.

Shu payt Migel Rodrigo zalga kirib keldi.

Migel Rodrigo: - Barchadan uzr so'rayman, vaqt borasida biroz xato qilibman. Ertangi o'yinga kelsak Bruno Garsiyani juda yaxshi bilaman. Vetnam bilan ikki marta o'rtoqlik uchrashuvi o'tkazdik. O'sha bahslarda so'nggi daqiqalarda qiyinchilik bilan g'alaba qozondik. Shu bois ertaga oson o'yin kutayotganim yo'q. Vetnam ham bizga muammo tug'dirishga urinadi.

- Vetnamning Tailandga qarshi o'yini haqida nima deya olasiz?
Migel Rodrigo: - O'yin teng kechdi. Durang bo'layotgan vaqtda katta sahnaga mahoratli futzalchilar chiqishadi. Tailand safida Supxavut shunday ishni bajardi va jamoasiga g'alaba keltirdi. Ertaga Vetnamdan juda katta qarshilik kutayapman.

- Qirg'iziston va Vetnam Eron bilan Yaponiyaga qarshi yutqazib qo'ysa o'zaro to'qnash kelib qolishlari mumkin. Qirg'iziston haqida nima deya olasiz?
Bruno Garsiya: - Hozir bor etiborim Yaponiya bilan o'yinga qaratilgan. Hali yutqazganimiz yo'q. Agar shunday bo'lsa keyingi matbuot anjumanida Qirg'iziston haqida o'z fikrlarimni bildiraman.

- Tailand bilan bahsda darvozaboningiz ajoyib o'ynadi. Ertaga u maydonga tusha oladimi?
Bruno Garsiya: - Umid qilaman ertaga barcha eng kuchli o'yinchilarimiz maydonga tushishadi. Darvozabonimiz ham shular qatorida.

Narzulla Saydullaev

Futzal. Yaponiya - Vetnam uchrashuvidan oldin murabbiylar fikrlari