Mahoratli futbolchi xorijlik hamkasblarimizga bergan intervyusida ser Aleks Fergyusonni qanchalik hurmat qilishi, Internet tarmoqlaridagi xabarlarga etibor qaratmasligi va boshqa malumotlar haqida gapirdi.

- RFPLda Diarra, Valbuena, Fibel, Vanker singari futbolchilar to'p surishgan. Ular bilan maslahatlashdingizmi?

- Avvalroq Lassana Anji va Rossiya chempionati haqida gapirgandi, shu bois bu borada qisqacha tasavvurga ega edim. Mahalliy sharoitga tezda moslashdim, ortiqcha qiyinchiliklarga yo'liqmadim. Klubda meni yaxshi kutib olishdi.

- Bordoda Loran Blan qo'l ostida shug'ullangansiz. Eski tanish-bilishchilik hurmati Franciya termasi tarkibidan joy olishga umid qilyapsizmi?

- Darhaqiqat, munosabatlarimiz ajoyib edi, u endigina murabbiylik faoliyatini boshlayotgandi. Ammo Loran bilan do'stlik rishtalarini bog'lashga ulgurmaganman, chunki boshqa jamoaga o'tgach, hammasi qaytadan boshlanadi. Yangi tanishlar, yangi sheriklar... Blan menga qo'ng'iroq qilib, termaga chaqirsa xursand bo'lardim, ammo Bordodan ketgach, yaqinligimiz barham topgan.

- Ser Aleks Fergyuson bilan ilk tanishuv qanday kechgan?

- Shartnoma tuzish chog'i uchrashgandik. O'shanda shifokorlar jarohatim borligini aniqlab, bitim imzolash shart emasligini takidlashgan. Ammo Fergyuson tiklanish uchun imkoniyat berishi, menga ishonishini aytgan. MYU - o'ziga xos jamoa. Boy tarixga ega, Skoulz va Giggz singari yuksak mahorat egalari bilan elkama-elka to'p surasan.

- Loran Blan va Kristian Gurkyuff muammolaringiz ruhiy holatingiz sababli kelib chiqishini takidlashdi...

- Barchasi tajriba va yosh tufayli vujudga keladi. Hammadan tez bo'lishga intilardim, ammo professional tomondan menga nimadir etishmasdi. Maqsadimga erishish uchun vaqt kerak edi. Umuman, murabbiylar borasida omadim kelgan, ammo hech kim ser Aleksga etolmaydi. Uning har bir qarori, harakatlari tahsinga sazovor. Fergyuson - afsona!

- MYUda hamisha ajoyib futbolchilar to'p surishgan. Nahotki, ular orasidan hech kim yulduzlik kasaliga chalinmagan bo'lsa?

- Ularning hammasi professionallar. Bazan futbolchilardan ham muhim bo'lgan holatlar uchraydi. Men o'ynagan paytdagi MYU azolari o'zlarini bir oila vakillaridek tutishardi. Shunday o'yinchilar bilan birga to'p surganimdan faxrlanaman, ulardan ko'p narsa o'rgandim.

- Jarohat tufayli Nyukaslda omadingiz yurishmadi, biroq ishqibozlar sizni tushunishmadi. Shunda og'ir holatga tushgandirsiz?

- Vaziyatdan kelib chiqib ish tutaman. Internetda men va jamoam haqida nima yozishayotganiga qiziqmayman. Chunki ko'pincha shaxsiyatga tegish hollari, nafaqat sen, balki oilang va yaqinlaring haqida turli gap-so'zlar ko'payishi kuzatiladi. Bularga aloqador bo'lishni istamayman. Shu bois, ishqibozlarning munosabatlaridan ham bexabarman.

- Sizningcha, Anji katta futbolga qaytishingiz uchun imkoniyat beradimi?

- Ha, muntazam maydonga tushish, doimiy o'yin amaliyotiga ega bo'lish, tajriba to'plash va eng yaxshilar qatoriga qo'shilish imkoniyati tug'ildi. Umuman olganda esa, jamoamning hamisha g'alaba qozonib, sovrinlarga ega chiqishini xohlayman. Bu borada doimo yordam berishga tayyorman.

O'.UMAROV tayyorladi

Gabriel Obertan: Fergyuson afsona