Футболчи 1989 йил ҳозирги Саха Республикаси (собиқ Якутия) Нерюнгри шаҳрида таваллуд топган. Икки ёшида ота-онаси билан бирга Германияга, Фюрт шаҳрига кўчиб кетган. Дастлаб 2009-2013 йилларда "Гройтер Фюрт" клубида ўйнаган. 2013 йилдан буён "Ганновер 96" шарафини ҳимоя қилиб келмоқда. Сайтимизнинг Германиядаги мухбири Мирон Гойхман Бундеслиганинг 32-туридан ўрин олган "Бавария" - "Ганновер" учрашувидан сўнг Эдгар Приб билан қисқа интервью ташкил этди.

- Сизни яна майдонда кўришдан хурсандмиз...
- Ҳа, икки йил тиззамни даволадим. Аммо ҳозир барчаси ортда қолди.

- Тиззангиз бошқа оғримаяптими?
- Барчаси яхши. Энг асосийси, яна майдонга тушаяпман. Ўтган турда илк бор майдонга тушдим. Бугун ҳам. Ҳа, ҳозирча фақат захирадан тушаяпман, аммо вақт ўтган сари барчаси яхшиланади деб умид қиламан.

- Сиз ўйнаётган "Ганновер"нинг бу мавсумда омади келмаяпти...
- Ҳа шундай. Яна иккита ўйин бор ва улар биз учун худди иккита финалдек бўлади. Иккала учрашувда ютишимиз шарт. Бу имкониятдан фойдаланиш учун бор кучимизни ишга соламиз. Мен эса жамоамга ёрдам беришга ҳаракат қиламан.

- Жароҳат олишингиздан олдин сизга Россиядан қизиқиш борлиги ҳақида хабарлар чиққанди.
- Ҳа, ахир Россияда туғилганманку. Аммо жароҳат олдим ва бу имкониятни қўлдан бой бердим.

- "Ганновер"даги сизнинг сардорлик боғичингиз Антон Вальдемарга ўтди. Ўзбекистонда уни ўзимиздан деб ҳисоблашади...
- У жуда ҳам қобилиятли футболчи. Ҳали ёш ва барчаси олдинда. Ундан Ўзбекистон терма жамоаси ҳақида сўрагандим, аммо у Германияда ўйнашни исташини маълум қилди, кейинроқ барчаси аниқ бўлади.

- Клубда қоласизми?
- Ҳозирча бу борада гап-сўз бўлгани йўқ. Ўйлашимча, дастлаб бу мавсумни якунлаб олиш керак, шундан кейингина бу борада ўйлаймиз.

- Вальдемарда ҳам шундай вазиятми?
- Балки шундайдир. Кўп нарса кейинги мавсум "Ганновер" қайси лигада ўйнашига боғлиқ бўлса керак.

Мирон Гойхман Мюнхендан championat.asia сайти учун махсус

"Ганновер" футболчиси "Бавария" билан ўйиндан кейин championat.asia сайтига интервью берди