- Men musobaqa boshlanishi avvalidanoq Germaniya JCHga jiddiy tayyorlanmaganini sezgandim. Gap guruhda oson raqiblar tushganida ham emas. Germaniya terma jamoasida, murabbiylar, futbolchilarda bir uy bor edi: Hammasi juda oson o'tadi, guruhdan ortiqcha qiyinchiliksiz chiqamiz, degan ishonch. Mundialga chempionlik toji bilan gerdayib keldik. Mundialga tayyorgarlik jarayonida terma jamoa hech qanday kuchli raqiblar bilan o'ynamadi, ularni mag'lub etmadi. Aksincha, tushunarsiz o'yinlar orqali tayyorgarlik ko'rildi. Avstriyaga mag'lub bo'lindi va katta qiyinchilik evaziga Saudiya Arabistoni yutildi. Ammo bu o'yinlar ham nemis mashinasining o'ziga bo'lgan yuqori bahosini hecham pasaytirmadi.

Biz hozir terma jamoa ichida nima bo'lganini bilmaymiz. Ammo shunisi aniqki, JCH paytida hammasi joyida bo'lmagan. Oxirgi paytlarda O'zil va Gyundogan mojarosi juda ko'p muhokama qilindi. Shuningdek, terma jamoa ichida futbolchilar guruhlarga bo'lingani haqida gap-so'zlar paydo bo'ldi. Umuman terma jamoa ichida muammolar va tayyorgarlik jarayonida xatoga yo'l qo'yildi.

Muammoni tarkib tanlash yoki birgina Sane bilan bog'lamagan bo'lardim. Leroy Sane hech qachon terma jamoa libosida yaxshi o'ynamagan. Futbolchilar orasida shunday toifa bo'ladi, klubda porlaydigan o'yinchilar terma jamoada o'zini ko'rsata olmaydi. Sane shunday toifa azosiga kiradi. Leroy terma jamoa futbolchisi hisoblanmagan. Terma jamoada etakchilikni qo'lga oladigan futbolchi topilmadi. Bu esa jiddiy savol. Mesut O'zil bilan hammasi malum. Xedira esa o'zining yorqin yillarini o'tkazib bo'ldi. Myullerga nima bo'lganini tushunmayapmiz. Etakchilar orasidan faqatgina Noyer avvalgidek o'ynadi. Faqatgina unga ortiqcha savollar yo'q!

Sanab o'tilgan futbolchilar terma jamoa yoshidan qarib qolgan degan fikrdan yiroqman. Aksincha, ular qarib qolishmagan, balki tajribali futbolchilarga aylanishgan. Faqatgina Xedira terma jamoadagi faoliyatini tugatishi mumkin. Qolganlar borasida bunday deyishga juda erta. Ular hali yana terma jamoada o'z imkoniyatlariga ega bo'lishadi. Lyov doim nemis mashinasiga sinovdan o'tgan va munosib futbolchilarni jalb qilgan. Bu yangilik emas. Avval esa uning shunday toifaga kiruvchi futbolchilari Lam, Shvayshtayger va Podolski bo'lgan. Lyovning bu ishongan futbolchilariga tayanishi esa doim ish bergan.

Shahboz Beg'amov maqolasi: "Rossiya yo'llarida buzilib qolgan - nemis mashinasi"

Endi nima bo'ladi? Yaqin 2-3 kun ichida barchasi malum bo'ladi. Lyov esa biroz o'ylab olishi kerakligini aytdi. Men ishonch bilan aytamanki, Lyov yakunda terma jamoada qolishga qaror qiladi. Men uning bu qarorni qabul qilishiga pul tikishim mumkin. Chunki Lyov ambiciyalarga to'la inson. Yogi o'tgan yili yozda bo'lib o'tgan Konfederaciyalar Kubogida ko'plab yoshlarni ko'rdi va Lyov bu yoshlarga yangi g'oya bera olishga qodir. O'ylashimcha, Germaniya Futbol Ittifoqi rahbariyati ham shunday fikrda.

JCH-2018da hech bir favorit jamoalar o'zlarini yaxshi taraflama ko'rsatishgani yo'q. Ammo ko'pchilik baribir pley-offga yo'llanma oldi. Germaniya esa uyga qaytishga majbur. Germaniya raqib darvozasi tomon juda ko'p marotaba zarbalar yo'lladi, ammo ularni golga aylantirish haqiqiy muammoga aylandi. Ammo jamoaning bu o'yini guruhdan chiqishga yaramasdi.

Bir muhim jihatni aytishim kerak, Germaniya futbolidagi eng katta muammo - biz o'zimizga juda yuqori baho beramiz. Germaniya o'zi o'ylaganchalik kuchli jamoa emas. Bu nafaqat terma jamoaga, balki ligalarga ham tegishli. Evrokuboklarda oxirgi yillarda faqatgina "Bavariya" muvaffaqiyat qozonyapti. Bundesligada oxirgi mavsumlardan xulosa qilsak, faqatgina ikkita jamoa futbol o'ynaydi - "Bavariya" va "Xoffenxaym". Qolgan jamoalar raqibdan kelib chiqqan holda futbol o'ynashadi. Asosan qarshi hujumga tayanishadi. Bu esa avvalgi Germaniya bormoqchi bo'layotgan yo'llarni yopishga xizmat qilmoqda.

"Germaniya o'z kuchiga yuqori baho beradi" - nemis jurnalisti Germaniyaning mundialdan qulashi haqida