Mazkur uchrashuvdan so'ng mezbonlar bosh murabbiyi Bahodir Shaymardonov fikrlarini bildirib o'tdi.

- “Xabaringiz bor, o'tgan turda juda alamli tarzda mag'lubiyatga uchradik. “Jomboy”ga qarshi o'yinga astoydil tayyorgarlik ko'rdik. Tarkib borasida katta tavakkalga qo'l urdik. Asosan yoshlarni maydonga tushirdik. Yoshlar berilgan imkoniyatni to'liq oqladi. Bugun imkoniyat berganimiz 2000 yilda tug'ilgan Islom Boysariev xet-trikka erishdi. Ochig'i, avvalgi turda “Zomin”dan uchralgan mag'lubiyat jamoaga qattiq tasir qildi. Biz juda yaxshi imkoniyatlarga ega bo'lsak-da, omadimiz kelmagandi. Shuning uchun ham “Jomboy”ni yutishimiz zarur edi.

- “G'ijduvon”ning bugungi kunda asosiy vazifasi nimadan iborat?

- Aslida bizning jamoamiz oldiga Pro-ligaga chempion sifatida yo'l olish vazifasi qo'yilgandi. “Zomin”ga mag'lubiyatga uchrab, imkoniyatlarimizni pasaytirib yuborgan bo'lsak-da, hali hamon maqsadimiz o'zgargani yo'q. Oxirigacha kurashamiz va maqsadimiz Pro-ligaga chiqish.

- Raqobatchi jamoalar borasida qanday fikrdasiz?

- Bu yilgi Birinchi liga bahslari qizg'in va murosasiz kechmoqda. Chunki men etibor bilan qaramoqdaman, har bir jamoada iqtidorli va yaxshi futbolchilar ko'p. Asosan yoshlar to'p surayotgan bo'lsa-da, kelajagi bor bollar ko'zga tashlamoqda. Aytaylik, “Zomin”, “Neftgazmontaj” va “Navbahor-Farm” jamoalarida yaxshi futbolchilar talaygina. Shu o'rinda PFL rahbarlariga bir taklifim bor edi. Kelgusi yillardan boshlab Pro-liga va Birinchi liga formatiga yaxshiroq etibor berishsa yaxshi bo'lardi. Negaki, Pro-ligada jamoalar soni kam. Ishoning, Birinchi ligadagi moliyaviy imkoniyati yuqori jamoalarni Pro-ligaga qo'yib, ishtirokchilar soni oshirilsa yanada qiziqarli o'yinlar soni oshardi. Birinchi ligada ham o'z oldiga vazifa qo'yadigan jamoalar chiqib keladi.

- Bugungi kunda “G'ijduvon” jamoasining moliyaviy holati qanday?

- Bu borada muammomiz yo'q. Rahbariyat mukofat pullarini bermoqda. Maoshlar bo'yicha ham uzilishlar deyarli yo'q. Rahbariyat yigitlarni shu tomonlama qo'llab kelmoqda.

"G'ijduvon" bosh murabbiyi Bahodir Shaymardonov: “Yoshlar berilgan imkoniyatni to'liq oqladi”