"Temiryo'lchilar" kecha poytaxtdagi TTYMI stadionida "Buxoro"ga qarshi o'rtoqlik uchrashuvida maydonga tushdi (0:0). Mazkur bahsdan so'ng "Lokomotiv"ning etakchi futbolchilaridan biri G'ulom Haydar G'ulomov fikrlari bilan o'rtoqlashdi.

"U qadar katta o'zgarish yo'q. Denis Korostichenko ko'proq Evropa uslubini singdirishga harakat qilmoqda. Bir nechta top jamoalarning o'yinlarini ko'rib kerakli jihatlarini o'zlashtirishga urinyapmiz. Kamchiliklar bor albatta. Jamoa birdaniga shakllanib qolmaydi. Boshlanishi yomon emas. O'tgan mavsumda Mikael Sekeyra qo'l ostida o'ynagan uslubimiz ularda anchadan beri bor. Bizga esa endi kirib kelmoqda. Maqsadimiz mana shuni mukammal darajaga olib chiqish.

Jamoada etakchilik? Bu - futbol. Mendan liderlikni kutganingiz bilan ertaga boshqa yosh futbolchi ushbu vazifani bajarishi ham mumkin. Misol uchun Kaxi Maxaradzeni ko'pchilik yoshi katta, deydi. Lekin maydonda bir nechta yosh futbolchidan katta hajmdagi ishni bajaradi. Maydonga tushish degani faqat yugurish emas. Aqlni ham ishlatish talab qilinadi. Mana shu jihatdan tajribali futbolchilar foyda keltiradi. Barchasi bir-biriga bog'liq. Yoshlar o'zlaridan kattalarga qarab o'rganadi",- deydi G'ulom Haydar G'ulomov

Abdulaziz Iskandarov yozib oldi

G'ulom Haydar G'ulomov: "Maqsadimiz - Mikael Sekeyra qoldirgan uslubni yanada mukammal darajaga chiqarish"