Жамоанинг тажрибали футболчиси Ғулом Ҳайдар Гулямов ушбу оқшомда олмалиқликлар дарвозасига чиройли тўп киритди. Мазкур гол амалда ўйинда бурилиш ясади, дея оламиз. Баҳс якунлангач ярим ҳимоячининг фикрлари билан қизиқдик.

"Учрашувдан олдин кўпчилик рақиб жамоанинг имкониятларини юқори баҳолаганди. Лекин кўряпсизки, мавсум стартида кутилмаган натижалар кузатилмоқда. Кейинчалик жамоалар ўз ўрнини топиб олиши мумкин. АГМК билан ўйинга келсак, икки жамоа бир-бирига қарши муносиб тўп тепди. Томошабинлар зерикиб қолишмади. Кимдир катта устунликка эга бўлгани йўқ. АГМК футболчилари бизга нисбатан кескинлик кўпроқ яратди.
Узоқдан гол уриш мураббий томонидан айнан бир футболчига айтилмайди. Буни вазият тақозо қилди. Аслида ҳимояга кўпроқ ёрдам берганим учун бундай вазиятлар кам бўлади. Голимни кичкина қизимга бағишлайман",- дейди Ғулом Ҳайдар Гулямов.

Абдулазиз Искандаров ёзиб олди

Ғулом Ҳайдар Гулямов: "АГМКга урган голимни қизимга бағишлайман"