Biroq ayni paytda ushbu futbolchi Qirg'izistonning "Neftchi" klubida to'p tepmoqda. Xo'sh nima uchun futbolchi qarorini o'zgartirdi? Shu va boshqa bir nechta savollar bilan Otabek Haydarovga yuzlandik.

- O'tgan mavsumda "Turon" safida o'ynab jamoa bilan Pro ligaga yo'llanma oldingiz. Biroq iyun oyida hakamlikni boshlaganingiz haqida xabarlar chiqdi. Rostdan ham katta futbolni yakunlab hakamlikka o'tganmidingiz?

- To'g'ri takidladingiz. O'tgan mavsum yakunlariga ko'ra "Turon" bilan Superliga yo'llanmasini qo'lga kiritdik. Shundan so'ng Maldiv chempionati vakilidan taklif bo'lgani uchun jamoadan ketishga qaror qildim. Buning ayrim sabablari bor. Dekabr oyida Maldivga etib bordim. 3 oy yaxshi o'ynab yurdim. Keyin esa jarohatlar ko'payib ketdi. Shundan so'ng faoliyatimni tugatish maqsadida uyga qaytdim. Hakamlikka o'tganim rost.

- Qaroringizni o'zgarishi nima bilan bog'liq? Hakamlik qiyin, eng ko'p tanqidlar, etirozlar ostida qoladigan soha hisoblanadi...

- Rostdan ham hakamlikka o'tdim. Buning o'ziga yarasha sabablari bor edi. Lekin bildimki juda og'ir kasb ekan. Hamma futbolchilar, murabbiylar ayniqsa muxlislar nafrat ko'zi bilan qarashni boshlashdi. Bu holat menga to'g'ri kelmasligini tushunib etdim. Hakamlik sohasida ishlayotgan hammaga sabr-toqat tiladim.

- Eshitishimizga qaraganda ayni paytda katta futbolga qaytgansiz va Qirg'izistonning "Neftchi" klubida o'ynayapsiz...

- Ushbu klubda oldin ham to'p tepganman. Menga begona emas. Birinchi marotaba o'ynayotganim yo'q. Xudoga shukur hozirda hammasi yaxshi.

- "Turon" jamoasining bu yil Superligadagi ishtirokiga qanday baho berasiz?

- "Turon" joriy mavsumda birinchi marotaba Superligada qatnashmoqda. Fikrimcha omad etishmayapti. Boisi har bir uchrashuvda juda yaxshi o'ynashmoqda. "Turon", "Qo'qon-1912" ishtirokidagi hamma o'yinlarni ko'rib boraman. G'alabalar ham bo'ladi. Ularga omad va zafarlar tilayman.

- Farg'onadagi barcha jamoada o'ynagansiz. "Neftchi" Pro ligada, "Qo'qon-1912" va "Turon" pastki o'rinlarda yuribdi. Baribir hamma natijaga qarab baho beradi. Sizningcha Farg'onada futbol pasayganmi?

- Yo'q, pasaygan deya olmayman. "Neftchi"ning oldiga Superligaga qaytish vazifasi qo'yilgan. Bu yo'lda ular jiddiy kurash olib bormoqda. Xudo xohlasa joriy yilda elitaga qayta olishadi. "Turon" va "Qo'qon-1912"ga yuqorida aytganimdek omad etishmayapti. Yaypandagi futbolga bo'lgan etiborni ko'rib odamni havasi keladi. Bu klublar o'z so'zlarini aytishlariga ishochim komil.

Abdulaziz Iskandarov suhbatlashdi

Hakamlikdan yana katta futbolga qaytishiga nima sabab bo'ldi? Farg'onada futbol pasayganmi? Otabek Haydarov bilan intervyu