"O'yin keskin o'tdi. O'ylashimcha biz o'yinda ustunlikka erishdik. O'yinimiz menga yoqdi, ammo natija yoqmadi. Vahimali hech narsa bo'lmadi, o'z oldimizga qo'yilgan vazifa - Superligaga chiqish uchun kurashishda davom etamiz", - dedi Hakim Fuzaylov.

- 77-raqamdagi futbolchi juda faol o'ynayotgandi, ammo uni almashtirdingiz...
- Fayzullo Jumanqo'zievni raqiblar ko'p bor yiqitishdi, shifokorlar unga necha bor yordam berishdi. To'g'ri u faol bo'ldi, golli pas berdi. O'yin anchagina keskin va to'qnashuvlarga boy bo'ldi. Hali oldinda o'yinlar ko'pligi uchun uni asrashga qaror qildim.

- Bugun legioner hujumchi Song Longji maydonga tushmadi...
- Bugun hujumchi Ro'zimboy Ahmedov ancha faol o'ynadi va gol urdi. Hujumda havoda ham, erda ham kurashlarda g'olib chiqdi. Yarim himoyachilarga katta yuklama tushdi. Shu bois Song Longjini maydonga tushirmadim.

- So'nggi daqiqalarda hakam bilan tortishib, sariq kartochka oldingiz. O'sha vaziyatda penalti bor edi deb hisoblaysizmi?
- Men vaziyatga yaqin turgandim, hakam esa mendan ham yaqinroq edi. To'p notabiiy holatdagi qo'lga tekkanini ko'rdim. Ammo PRO ligada VAR yo'q. Hakamlarni tekshiradigan komissiya bor. Ularning xulosasini kutamiz.

Hakim Fuzaylov: "O'yinimiz menga yoqdi, ammo natija yoqmadi"