Маросимнинг биринчи қисмида меҳмонлар устози Ҳамиджон Актамов иштирок этди ва журналистларни қизиқтирган саволларга атрофлича жавоб қайтарди.

Ҳ.Актамов: Аввало, “Бунёдкор” жамоасини бугунги ҳақли ғалаба билан табриклайман. Ўйин оғир бўлди. Майдон эгалари хато қилишимизни кутишди ва амалда бунга эришишди. Улар икки вазиятда бизни жазолашди. Иккала голни ҳам ўзимиз олиб келдик. Хатолар қимматга тушди. Агар ўзимиз ўйин давомида юзага келтирган хавфли вазиятларимизни голга айлантира олганимизда, якуний ҳисоб умуман бошқача кўринишда бўлиши мумкин эди.

Ўйинга руҳий тайёргарлик кўнгилдагидек бўлмадими? Йўқ, мен бундай фикр билдиришдан йироқман. Бугунги учрашувда қарши ҳужумлардан фойдаланишни мақсад қилгандик. Энди биласизми, ҳар бир билдирадиган фикрим баҳонага айланиб қолиши мумкин. Масалан, куннинг иссиқлиги. Ёки бўлмаса, вазиятлардан фойдалана олмаганимиз. Сиз “Бунёдкор” футболчилари “Қизилқум” ўйинчиларига қараганда кўпроқ югуришди, деяпсиз. Билмадим, балки ҳақдирсиз. Аммо, мағлубиятни ўзимизнинг иккита хато эвазига сотиб олдик. Беш нафар легионернинг ҳаракати ҳам бугун фойда бермади.

“Қизилқум” жамоаси футболчиларининг ўртача ёши 31ни ташкил қилмоқда?! Мен статистикадан кўра аниқ фактлар билан ишлашни хуш кўраман. ЖЧ-2018да Россия терма жамоаси таркибида 38 ёшни қоралаган футболчи ўйнаяпти. Лекин ёшлардан кўра ҳаракати яхши бўлгани учун мураббий унга ишонч билдиряпти. Суперлига томонидан ўтказилган тестларда сиз айтган “қари футболчилар” белгиланган нормативларни жуда яхши топширишди. Ҳаракати яхши бўлган футболчини “брак”ка чиқара олмайманку! Миржалол Қосимов, Муҳсин Убайдуллаев сингари ёшлар ҳам ўйнашяпти. Буни ҳам эсдан чиқармаслик керак. Кейин битта ўйинда ютқазгани учун жамоани “кўмиб” қўйиш ҳам керак эмас. Бундан аввалги 5-6та учрашувда мағлубиятга учраганимиз йўқ. Жўжани кузда санаймиз. Ҳали олдинда ўйинлар бор.

Суперлигада кучли олтиликка киришга ҳаракат қиламиз. Назарий жиҳатдан ҳали имкониятимиз бор. Ўзбекистон кубоги учун мақсад қўйилган. Қуръа натижасига кўра 1/4 финалда “Қўқон-1912” жамоаси билан ўйнаймиз. Жорий йил ҳисобидан чемпионатда иккита, кейин назорат ўйинларида ҳам бу жамоа билан тўқнаш келдик. Умумий устунлик биз томонда. Ўйлайманки, биз “Қўқон-1912” тўсиғидан ўтиб оламиз.

Шаҳбоз Беғамов ёзиб олди

Ҳамиджон Актамов: “Битта ўйинда ютқазгани учун жамоани “кўмиб” қўйиш керак эмас”