- Yirik mag'lubiyat tufayli o'yin haqida hech narsa deya olmayman. Xatolarimiz ko'p. Bu baxona emas. Zaxiradan o'yinni kuchaytiradigan futbolchilarimiz yo'q. Asosan yoshlarga ishonch bildiryapmiz. "So'g'diyona" bilan bo'lgan bahsda ko'plab jarohatlar olingani tufayli bugun ular bizga yordam bera olishmadi. "Paxtakor" bizning yarimta xatolarimizni ham jazoladi.

Elguja Grigalashvilining ham jarohati bor edi. Biroq tanaffusda mag'lubiyatga chidolmagani bois o'zi maydonga tushirishimni iltimos qildi. Shu boisdan ham uni maydonga tushirdim. Aslida bugun uning xizmatidan foydalanmoqchi emasdik. Chunki jarohati bois tavakkalga qo'l urmoqchi bo'lmagandim. O'yinda ham to'liq kuchi bilan yugura olmadi. Uning jarohati og'ir.

- "Qizilqum" boshqaruvidagi o'yinlaringizda mag'lubiyatlar soni g'alabalardan ko'payib ketgan. Jamoaning joriy mavsumdagi holati ham yaxshi emas. Bu borada qanday izoh bera olasiz?

- "Qizilqum" bilan "Paxtakor" tenglashtirish to'g'ri kelmaydi. Masalanda. Bu futbol. Hech kim maydonga yutqazaman deb tushmaydi. Hamma ishlayapti, harakat qilyapmiz. Meni qo'l ostimda ikkita emas, balki 1,5ta ham tarkib yo'q. Bugun yoshlarni qo'ydik. Yoshlar jamoasida iliq taassurot qoldirgan futbolchilarga imkon berdik. O'tgan gal yoshlarni tushirmaysan, degan savollar uchrardi. Yoshlarni tajribasi yo'q, ular "Paxtakor" bilan tenglasha olmaydi. O'yin amaliyoti berish maqsadida ularga imkoniyat taqdim etdim.

Ayni paytda selekciya ishlari olib borilmoqda. Ikkinchi davrada jamoadan ketadigan va keladigan futbolchilar ham bo'ladi. Yozgi tanaffusdan so'ng "Qizilqum" umuman boshqa jamoaga aylanadi. Biz jamoaga yangi qon olib kirmasak bo'lmaydi.

Qayd etish joiz, bugun "Qizilqum" Hamidjon Aktamov qo'l ostidagi eng yirik mag'lubiyatini qabul qildi. Shu tariqa Hamidjon Aktamov "Qizilqum" boshqaruvidagi 114-o'yinida (Oliy liga/Superliga, O'zbekiston Kubogi, Liga Kubogi) 44-mag'lubiyatni tan oldi. Shuningdek, Aktamov 38 g'alaba va 31 durang qayd etgan. To'plar nisbati: 136-165.

Hamidjon Aktamov: "Ikkinchi davrada "Qizilqum" butunlay boshqa jamoaga aylanadi"