"Bugungi Hayit bayrami bilan barcha yurtdoshlarimizni tabriklayman. Shunday kunda muxlislarimizni quvontirganimizdan xursandmiz. Juda ham qiziq o'yin bo'ldi, anchadan buyon bunday ko'p muxlis qarshisida o'ynamagandik.

Kim gol ursa o'sha g'alaba qozonardi, bitta golgacha o'yin bo'ldi. Birinchi taymda ko'p vaziyatlarga ega bo'ldik, ikkinchi taymda birinchi taymdan ham yaxshiroq o'ynadik. Gol urib g'alaba qozonganimizdan xursandmiz. Shunday muxlis bilan to'lib toshgan stadionda g'alaba qozonish yoqimli.

Bugun aslida "Turon" mag'lub bo'lmadi, balki shunday sharoitlarga ega bo'lgan klub paydo bo'lgani bu o'zbek futbolining yutug'i. Stadionga ko'plab muxlislar keldi va zavq olishdi. Kecha Yaypanga kelgandik va klubdagi barcha sharoitlar bilan tanishib chiqdik. O'zbekistonda yaxshi sharoitlarga ega bo'lgan sanoqli futbol klublari bor. "Turon" shular qatoriga kirib ulguribdi", - deydi Aktamov.

- "Qizilqum" klubini qachon xalqaro maydonlarda ko'rishimiz mumkin?
- Nasib qilsa mana shu mavsum yuqori o'rinlarga egallashga va xalqaro maydonga chiqishga urinamiz. Hali mavsum oldinda, maqsadimizga etisha olamiz deb o'ylayman.

- "Turon"ning o'yinini ko'rdingiz, sizningcha keyingi o'yinda "Turon" g'alaba qozona oladimi?
- Bu futbol. Biz ham birinchi turda yutgandik, keyin ketma-ket duranglar va mag'lubiyat qayd etdik. Nihoyat bugun g'alabaga erishdik. "Turon"da yaxshi futbolchilar ko'p ekan, legionerlar ham kuchli ekanligi ko'rindi. O'yindan-o'yinga barchasi yaxshi bo'ladi deb o'ylayman.

Hamidjon Aktamov: "O'zbekistonda yaxshi sharoitlarga ega bo'lgan sanoqli futbol klublari bor - "Turon" shular qatoriga kirib ulguribdi"