Ўйиндан сўнг "Бунёдкор"нинг ёш иқтидорли футболчиси Иброҳим Ҳалил Йўлдошев фикрларини билдирди.

"Ушбу учрашувга яхши тайёргарлик кўргандик. Бизни фақат ғалаба қониқтирарди. Чунки, турнир жадвалидаги ўринимиз қалтис, "Насаф" ютса учинчи ўринга кўтарилиб оларди. Агарда ОЧЛга йўлланма оладиган бўлсак барча ўйинларда ғалаба қозонишимиз керак. Кутилганидек қийин ўйин бўлди.

Ҳа, айрим ўйинларда биринчи бўлимни кўнгилдагидек ўтказа олмаяпмиз. Голга тортадиган вазиятлардан фойдаланишга қийналяпмиз. Тўғри, учрашувда эҳтиёткорликка эътибор қаратмоқдамиз. Гол ўтказиб юборганимиздан кейин босимни ошириб вазиятни ўнглашга ҳаракат қилдик. Иккинчи голдан кейин ҳам саросимага тушмадик. Бу гол бизга далда бўлди, охиригача курашишга мажбур қилди. Жон жаҳтимизни бердик ва мағлубиятдан қутулиб қолдик. Учинчи голни уришимиз ҳам мумкин эди. Лекин, омад келмаса қийин экан.

"Қизилқум" билан биринчи даврадаги сўнги учрашувни ўтказамиз. Бор кучимиз билан ғалаба учун тўп тепамиз. Рақиб жамоа ҳам охирги пайтларда таркибини кучайтириб олди, яхши ўйин кўрсатмоқда. Буни ҳам унутмаслик керак. Биринчи даврани ғалаба билан якунлашни истаймиз",- дейди Йўлдошев.

Абдулазиз Искандаров ёзиб олди.

Иброҳим Ҳалил Йўлдошев: "Биринчи даврани ғалаба билан тугатишни истаймиз"