O'yindan so'ng "Bunyodkor"ning yosh iqtidorli futbolchisi Ibrohim Halil Yo'ldoshev fikrlarini bildirdi.

"Ushbu uchrashuvga yaxshi tayyorgarlik ko'rgandik. Bizni faqat g'alaba qoniqtirardi. Chunki, turnir jadvalidagi o'rinimiz qaltis, "Nasaf" yutsa uchinchi o'ringa ko'tarilib olardi. Agarda OCHLga yo'llanma oladigan bo'lsak barcha o'yinlarda g'alaba qozonishimiz kerak. Kutilganidek qiyin o'yin bo'ldi.

Ha, ayrim o'yinlarda birinchi bo'limni ko'ngildagidek o'tkaza olmayapmiz. Golga tortadigan vaziyatlardan foydalanishga qiynalyapmiz. To'g'ri, uchrashuvda ehtiyotkorlikka etibor qaratmoqdamiz. Gol o'tkazib yuborganimizdan keyin bosimni oshirib vaziyatni o'nglashga harakat qildik. Ikkinchi goldan keyin ham sarosimaga tushmadik. Bu gol bizga dalda bo'ldi, oxirigacha kurashishga majbur qildi. Jon jahtimizni berdik va mag'lubiyatdan qutulib qoldik. Uchinchi golni urishimiz ham mumkin edi. Lekin, omad kelmasa qiyin ekan.

"Qizilqum" bilan birinchi davradagi so'ngi uchrashuvni o'tkazamiz. Bor kuchimiz bilan g'alaba uchun to'p tepamiz. Raqib jamoa ham oxirgi paytlarda tarkibini kuchaytirib oldi, yaxshi o'yin ko'rsatmoqda. Buni ham unutmaslik kerak. Birinchi davrani g'alaba bilan yakunlashni istaymiz",- deydi Yo'ldoshev.

Abdulaziz Iskandarov yozib oldi.

Ibrohim Halil Yo'ldoshev: "Birinchi davrani g'alaba bilan tugatishni istaymiz"