- G'alaba bilan tabriklayman. Bugungi o'yin haqidagi fikrlaringiz bilan o'rtoqlashsangiz.

- Qiyin o'yin bo'ldi. Farg'onadagi o'yindan keyin tiklanib olish qiyin edi. Kubokdagi bahsni hisobga olmayapman. Chunki unda butunlay yosh bolalar o'ynadi. Mayli, Xudoga shukur, g'alaba qozondik, eng muhimi shu. Albatta, qizil kartochka tufayli biz uchun o'yin biroz qiyinlashdi. Lekin yigitlar o'z ishlarini alo darajada bajarishdi, fidoyilik ko'rsatib, diqqat-etibor bilan o'ynab, gol o'tkazib yubormasdan ustunlikni saqlab qolishdi. Shuningdek, muxlislarga alohida minnatdorchilik bildiraman.

- Bugun Superligadagi beshinchi golingizni urdingiz. Joriy mavsumda minimum nechta gol urishni maqsad qilgansiz?

- Reja qilmayman. Men maydonga tushganimda har bir o'yinda gol urishni xohlayman. Xudo xohlasa, qanday bo'lsa shunday bo'ladi, bu Yaratganning irodasiga bog'liq. Shuning uchun qancha ko'p bo'lsa, shuncha yaxshi. Menda bunday narsa yo'q. Bilasizmi, 20 ta gol urish kerak bo'lsa-yu, vazifani bajarib, divanga yonboshlab olish mumkin. Biroq bu sportchiga xos jihat emas. 50 ta bo'ladimi, 10 tami, imkon qadar ko'prog'iga harakat qilaman. Shuning uchun bu erda aniq raqam aytmoqchi emasman.

- Gollaringiz nafaqat "Paxtakor", balki O'zbekiston terma jamoasiga qaytishingizni istayotgan muxlislarni ham xursand qilmoqda...

- Qo'llab-quvvatlayotganlarning barchasiga katta rahmat. Juda minnatdorman. Bu men uchun yoqimli. Oldingi intervyuda ham aytganimdek, terma jamoaga qaytish uchun qo'limdan kelgan barcha ishni qilaman.

- Alijonov bilan hamkorlikda "Mashal"ga qarshi o'yinda ham shunday gollar urgandingiz. Mashg'ulotlarda bunday vaziyatlar ustida alohida ishlaysizlarmi?

- Biz ko'p narsalarni mashq qilamiz, lekin aynan shunday holatlarni maxsus tayyorlamaymiz. Har bir o'yin uchun malum rejalarimiz bor va biz ularni bajarishga harakat qilamiz. O'yin davomida esa vaziyatga qarab harakat qilamiz.

Igor Sergeev: "20 ta gol urish kerak bo'lsa-yu, vazifani bajarib, divanga yonboshlab olish mumkin, biroq..."