"Tobol" sharafini himoya qilayotgan o'zbekistonlik hujumchi Igor Sergeev "Shaxtyor Karagandi"ga qarshi bahsda dubl qayd etdi. Futbolchi saytimizga taasurotlari va terma jamoaga chaqirilmagani bilan bog'liq savollarga javob berdi.

- Igor dubl va jamoangizning g'alabasi bilan tabriklaymiz. Umuman taasurotlar va hissiyotlar bilan bo'lishsangiz?

- Albatta, gol urganimdan xursandman. Yana bir quvonarli jihati bu uchrashuvda g'alaba qozondik. "Shaxtyor Karagandi"ga qarshi qiyin o'yin bo'ldi, deya olaman. Lekin jamoamiz o'z maydonida to'p tepdi. Muxlislarimizni xursand qila oldik, deb o'ylayman. Shunday ekan taasurotlar ajoyib.

- Qozog'iston chempionatining bu turi o'zbekistonliklar benefisiga aylandi. Sizdan tashqari Bobir Abdixoliqov, Shahboz Umarov ham gol urdi...

- Albatta, bundan xabarim bor. Bu shunchaki zo'r. Bizning futbolchilar o'zlarini boshqa chempionatda ham ko'rsatayotganiga ijobiy qarayman. Ularga omad tilayman.

- Bobir Abdixoliqov Belarus chempionatidan so'ng, Qozog'istonda ham o'zining nimalarga qodirligini ko'rsatmoqda. Bu uning ligalar orasida farq bo'lishiga qaramasdan tezda moslashib ketganidanmi?

- Yaxshi hujumchi. Agarda yanada rivojlanishda davom etsa, kuchli tomonlarini ko'rsata olsa, faqat mamnun bo'laman. Bobirga faqat muvaffaqiyat yor bo'lsin, deb qolaman.

- Ko'pchilikni qiziqtirayotgan savol. Dastlab O'zbekiston terma jamoasiga chaqirilganingiz haqidagi xabarni o'qidik. O'FA taqdim qilgan ro'yxatda esa yo'q edingiz. Bu vaziyatga qanday izoh bera olasiz?

- Terma jamoa ustozi shunday qaror qabul qilgan ekan, demak, buning sabablari bor. O'zim haqimda shuni aytishim mumkinki, bo'lg'usida chaqiruv olish uchun yanada ko'proq ishlashim kerak.

- O'zbekiston Superligasi dastlabki ikki turi "Paxtakor" uchun omadsiz o'tdi. Bu holatni kutilmagan deyish mumkinmi? Keyingi turda "Navbahor" bilan o'yin kutmoqda...

- Ha, chindan bu kutilmagan holat. Ochig'i, nega bunday natija qayd etilganini bilmayman. Lekin ishonamanki, "Paxtakor" xatolari ustida ishlaydi va maqsadi sari oldinga intilishda davom etadi. "Navbahor" bilan o'yinda esa kuchli jamoa yutsin.

Igor Sergeev: "Terma jamoa ustozi shunday qaror qabul qilgan bo'lsa, sabablari bordir"