Futbolda mayda detallar bo'lmaydi va etiborsiz qoldirilgan kichik narsa ko'p narsalarni hal qilib yuborishga qodir. Sarlovhaga etibor bering, O'zbekistondan ikki kun kech o'ynagan Tailand, O'zbekistondan ikki kun ko'proq dam olish imkoniyatiga ega bo'ldi. "Matematikaga ham to'g'ri kelmaydi-ku",- deyishingiz tabiiy. Lekin mantiqqa mutlaqo mos keladi.

Guruh bosqichining ikkinchi turida O'mon bilan durang o'ynagan va 4 ochkoni "to'rvasi"ga solib qo'ygan Tailand oxirgi turda Saudiya Arabistoniga qarshi maydonga tushdi. Bu o'yinda Masatada Ishi avvalgi o'yinda maydonga tushgan 11 nafar shogirdining barchasini almashtirdi va zaxiraga olib qo'ydi. Saudiya bilan ikkinchi tarkib 0:0 o'ynab qo'ya qoldi. Six ham, kabob ham kuymadi. Solishtirish uchun esa quyida tarkibni ko'rishingiz mumkin.

Tailandning O'monga qarshi asosiy tarkibi: Xammai, Mikkelson, Xemvibun, Dola, Bunmatxan, Yuyen, Pxal, Chamratsami, Sarachat, Pompan, Jayded, Mueanta

Saudiya Arabistoni bilan o'yinda ilk daqiqalardan harakat qilgan futbolchilar: Anuin, Burirat, Txongsong, Praisuvan, Channgom, Yuyen, Charenrattanapirom, Kanitsribampen, Kaman, Vonggorn, Poeipimai

Bu bilan Tailandning yaponiyalik ustozi Masatada Ishi jamoaning yarimiga dam berdi va qo'shimcha ikki kun dam olish imkoniyatini yaratib berdi. Saudiya Arabistoni bilan zaxiradan maydonga tushgan faqat 3 nafar futbolchi O'monga qarshi to'liq o'ynagan.

Chamratsami - 90-daqiqada almashtirilgan

Jayded - To'liq o'ynagan

Pompan - 86-daqiqada almashtirilgan

Deylik, O'zbekiston ham Avstraliya bilan o'yin oldidan 6 ochkoga ega bo'lganida, Katanec zaxira tarkibidan foydalanishi mumkin edi. Umuman olganda endi bu ahamiyatsiz.

Ikki kun kech o'ynagan Tailand bizdan ikki kun ko'p dam oldi