Mavsum yakunlariga ko'ra, uning jamoasi chempionatni 3-o'rinda yakunladi. Xo'sh, Aliboevning kelgusida qanday rejalari bor? Shu haqda uning o'zi malum qildi.

- Yangi jamoamdagi faoliyatim bir maromda kechmoqda, - deya gap boshladi Aliboev. Biz chempionatni 3-o'rinda tugatdik. Endilikda K1 Ligasiga yo'llanma olish uchun pley-off o'yinlarida ishtirok etamiz. Maqsadimiz, ushbu pley-off bahslarida muvaffaqiyatli qatnashmoqchimiz. Jamoamizning asosiy maqsadi kelgusi yilda Janubiy Koreyaning Superligasida ishtirok etish hisoblanadi.

- Ikrom, siz bundan avval “Seul” bilan kuchlilar orasida to'p tepdingiz. Xo'sh, Koreyaning ikki ligasi o'rtasida tafovut bormi?
- Unchalik katta tafovut yo'q. K1 va K2 liga jamoalarining kuchlari deyarli teng. Deylik, “Chonbuk Motors” bilan “Ulsan” klublari boshqalarga nisbatan biroz kuchliroq. Qolganlarning saviyasi deyarli bir xil.

- Jarohatingizdan keyingi holatingizni qanday baholaysiz?
- To'g'risi, jarohatdan keyin sport formamni tiklashga katta etibor qaratgandim. Barchasi joyiga tushib bormoqda.

- “Tedjon” bilan shartnomangiz qachon tugaydi?
- Shartnomam muddati shu yilning dekabrida poyoniga etadi.

- Kelgusidagi rejalaringiz qanday?
- Hozirdan biror nima deya olmayman. Shu o'rinda “Tedjon” klubi men bilan amaldagi shartnoma muddatini uzaytirishni taklif qilmoqda. Boz ustiga, oldimda boshqa jamoalardan ham yaxshi takliflar tushgan. Hozircha yakuniy qarorga kelganim yo'q. Barchasini vaqt ko'rsatadi.

- Balki O'zbekistonga qaytishingiz mumkinmi?
- Bunga ham avvaldan biror nima deya olmayman. Barchasini vaqt ko'rsatadi.

Ikrom Aliboev: “Maqsad – yuqori ligaga chiqish”