Futbolchi suhbat davomida jarohati xususida ham fikr bildirdi.

"Jarohatim bitta vaziyatda yuzaga kelmagandi. U yillar davomida yig'ilib keldi. Ushbu jarohat bilan o'yinlarda qatnashdim. O'sha paytlar murabbiy o'zgarib, o'yin amaliyoti bermayotganlar paytlar edi. Shunday vaziyatda o'tgan yilning oktyabr oyida terma jamoa yig'inlariga chaqirildim. Bir tomonda "Seul" bilan OCHLga tayyorlanishimiz kerak edi. Mashg'ulotlarga qo'shilishimga jarohatim yo'l qo'ymadi. Qatiy tashxis qo'yilishini koreyalik shifokorlarga aytdim. Tekshirishdi, baribir topa olishmadi. Jarohat qorin sohasi orqali ketgandi. Oxiri O'zbekistonga qaytdim. O'zimizdagi shifokorlarga ko'rsatdim. Ular ham aniq sababini bilishgani yo'q. Yangi mavsum oldidan Koreyaga qaytib bordim. Mashg'ulotlarni boshlayotganimda yana jarohat pand berdi. Bunday pallada ruhiyatim ham tushib ketdi.
Seuldagi milliy universitetning eng yaxshi shifokoriga olib borishdi. U shifokor bir haftadan so'ng tashxis qo'yishini, so'ng operaciya qilishini aytdi. Koreyadagi do'stlarim orasida bunday jarrohlik amaliyotini o'taganlar bor ekan. Ularning aytishicha, operaciya muvaffaqiyatli chiqmagan. Do'stlarimning tavsiyasi bilan Germaniyaga borishni maqsad qildim. Mazkur istagimni klubdagilarga ham aytdim. "Seul"dagilar Koreyadagi operaciya qildirsam, barcha mablag'larni to'lab beramiz, deyishdi. Germaniyada esa o'zim qildirishimni takidlashdi. Sog'liq birinchi o'rinda turganda pul ko'zga ko'rinmaydi. Jarohat yuqorida aytganimdek qorin va oyoq sohasini birlashmasida bosim ko'payganidan nervlar siqilib qolgan. Uni jarrohlik amaliyoti bilan to'g'irlashdi. Hozirda holatim 90, 95 foizga yaxshi",- deydi Ikrom Aliboev O'FA matbuot xizmatiga.

Ikrom Aliboev: "O'zbekistonda ham, Koreyada ham jarohatimni sababini ayta olishmadi. Germaniyada o'z hisobimdan operaciya qildirdim"