Etakchi jamoalarning "Andijon"dan ochko olishi hamma o'ylagandek oson kechmayapti. Xuddi shunday "Paxtakor"ni ham "Bobur Arena"da o'ta qiyin bahs kutmoqda. Mazkur uchrashuv oldidan "burgutlar" sardori Ildar Mamatkazin fikrlarini bildrib o'tdi.

- Superligada har bir o'yinning qiymati va darajasi o'ta yuqori. "Andijon" uchun ham, "Paxtakor" uchun ham ayni paytda g'alaba zarur. Shiddatli kechishi kutilayotgan bellashuvga "Andijon" qanday tayyorlanyapti?

- Uchrashuvga tayyorgarlik yaxshi ketmoqda. Murabbiylar shtabining bu o'yinga ishlab chiqqan rejasi bor. Shu reja bo'yicha hozirlik olib boryapmiz. Umid qilamanki, uchrashuv yakunida ijobiy natija bizniki bo'ladi. Buning uchun mehnat va yana mehnat talab qilinadi.

- "Burgutlar" mudofaa chizig'ining vakili sifatida aytingchi, raqib safida Turg'unboev, Cheran kabi nomlarning maydonga tushmasligi qanchalik qulaylik tug'diradi?

- "Paxtakor"da nafaqat bu ikki futbolchi balki barcha futbolchilari saviyali va mahoratli hisoblanadi. To'g'ri siz aytgan nomlar jamoaning etakchisi. Ammo ularda jamoaviy o'yin shakllangan. So'nggi uchrashuvlarda kerakli natijaga erisha olmayotgandir. Ammo o'yin taraflama yomon ko'rinmayapti. Barchasiga maydonda guvohi bo'lamiz.

- "Andijon" o'z maydonida ikkinchi davrada hali mag'lubiyatga uchragani yo'q. Bu bevosita stadiondagi muhit bilan bog'liqmi yoki boshqa sababmi?

- Uydagi o'yinlarda bizning asosiy qurolimiz muxlislarimiz hisoblanishadi. Maydonda 11 kishi to'p tepsa, 12 o'yinchimiz ulardir. Muxlislarning qo'llab-quvvatlashi har qanday futbolchiga katta kuch beradi va oldinga borishga chorlaydi. Stadiondagi atmosfera esa shunchaki bomba!

- "Andijon" raqibiga qanday sovg'a tayyorlayapti?

- Shu kuni biz muxlislarimizni xursand qilishimiz kerak. Barchamiz birlashib faqat g'alaba uchun maydonga chiqamiz.

- Jamoa Superligada qolish missiyasini deyarli bajarib bo'lgan va endilikda kuchli beshlikka kirishga harakat qilib ko'radi. Bu navbatdagi o'yinlarda bosimni olib tashlaydimi?

- Maqsadimiz mavsumni kuchli beshlikda yakunlash. Buning uchun qolgan o'yinlarda maksimal ochko to'plashimiz kerak. Bosim har doim bo'lgan. Chunki pastdagi jamoalar bizga yaqinlashib olishi hech gapmas. Shu bois bo'shashishga haqqimiz yo'q.

Abdulaziz Iskandarov suhbatlashdi

Ildar Mamatkazin: "Maqsadimiz mavsumni kuchli beshlikda yakunlash"