Uchrashuvda jamoasining dastlabki golini urgan Ilhom Alijonov saytimizga qisqa intervyu berdi.

- "Andijon" jamoasi uchun "Qizilqum"ga qarshi o'yin qanday kechdi?

- Og'ir o'yin bo'lishini kutgan edik, chunki "Qizilqum" oxirgi uchrashuvlarni muvaffaqiyatsiz o'tkazayotgandi. Bizga qarshi 200 foiz kuchini ishga solishi aniq edi. Xudoga shukurki, ishonchli hisobda g'alaba qozondik.

- "Andijon" so'nggi uchrashuvlarda hujumkor o'yin ko'rsatmoqda. Bu futbolchilarning yaxshi formaga kirib olganidanmi yoki murabbiylar shtabi taktikani o'zgartirganligida?

- To'g'ri aytdingiz. Hozirgi futbolda eng yaxshi himoya – bu hujum. Ko'proq hujum qilib vaziyatlar yaratishga harakat qilmoqdamiz. Murabbiy jamoaga qarab taktika tuzyapti. Bazida hujumkor, bazida himoyaviy o'yin ko'rsatyapmiz.

- Mavsum boshida zaxirada qolayotgandingiz. Bu raqobat bilan bog'liqmidi?

- Mening poziciyamda raqobatchim legioner edi. Tojikiston terma jamoasi sardori. Unga imkoniyat ko'proq berildi. Mana endi sekin-asta asosiy tarkibda maydonga tushyapman. Murabbiyning ishonchini oqlab tursam, davomiy bo'ladi degan umiddaman.

- Jamoadagi moliyaviy muammolar futbolchilarning kayfiyatiga tasir qilmayaptimi?

- Tashkiliy ishlar borasida yashirishning hojati yo'q, biroz moliyaviy muammolar borligini bilasiz. Bunga ahamiyat bermasdan, o'yinga o'zimizni professional darajada tayyorlab tushyapmiz. Bunga sabab muxlislar. Futbol ular uchun o'ynaladi. Moliyaviy tomonlar ham yaxshi bo'lib qoladi. Sabr qilamiz. Har bir uchrashuvda qo'llab-quvvatlayotgan muxlislarga rahmat aytaman.

Abdulaziz Iskandarov suhbatlashdi

Ilhom Alijonov: "Andijon" muxlislari uchun o'ynayapmiz. Muammolar? Sabr qilamiz"