Xabaringiz bor, 10 avgust kuni PFL o'z rasmiy saytida Superliganing oltita klubida badal puli, jarimalar va legionerlar uchun to'lanadigan puldan qarzdorlik borligi haqida xabar bergandi. Qarzi bor klublar orasida "Navbahor" ham keltirib o'tilgandi.

Bugun ushbu jamoa bosh murabbiyi Ilhom Mo'minjonov biz bilan aloqaga chiqib, PFL oldida klubning qarzi qolmaganini malum qildi.

"Shuni mamnuniyat bilan ayta olamanki, bugun barcha qarzlardan qutuldik, - deydi "lochinlar" ustozi. - Bundan barchamiz xursandmiz. Qarzlardan to'liq qutulish birmuncha uzoq davom etdi, yani olti oyga yaqin. Lekin bu orada PFL bizni ko'p ham siquvga olmadi, tashkilotdagilar klubimizning moliyaviy holatini tushunishga harakat qilishdi. Buning uchun PFL rahbariyatiga minnatdorchilik bildiraman".

Xabaringiz bor, "Navbahor" o'tgan tur o'z maydonida "Buxoro"ni 2:0 hisobida mag'lub etdi. Uchrashuvning oxirgi 10 daqiqasida "Navbahor"ning uch futbolchisi atayin sariq kartochka oldi. Natijada PFL futbolchilarning xatti-harakatini o'rganib chiqqan holda klubni hamda o'sha futbolchilarni jazolashga qaror qildi.

Ilhom Mo'minjonov bu voqeaga ham munosabat bildirdi: - "Albatta, o'sha kuni juda xunuk ish bo'ldi. Men futbolchilarimni oqlay olmayman. PFLning qarorini esa hurmat qilishimiz lozim. Bunday holat jamoamiz bilan boshqa takrorlanmasligiga va futbolchilar bilan tarbiyaviy ishlar olib borishimizga vada beraman".

Ilhom Mo'minjonov: "PFL oldidagi qarzlardan to'liq qutuldik"