- Ўйин ҳақида фикрингиз?

- Аввало "Бухоро"ни Ўзбекистон Кубоги ярим финалига чиққани билан табриклайман. Ҳозир кимнидир ҳимоя қилиб ёки кимнидир танқид қилмоқчи эмасман. Фақат шуни айтишим мумкин, бу ўйин менга катта дарс бўлди. Бундай ўйинлар барибир мураббийнинг тажрибаси ошишига ёрдам беради. Футболчиларимиз кўп ҳаракат қилишди. Ҳатто ҳисобни 2:2 кўринишга келтира олдик. Охирги йигирма кун ичида тўртинчи ё бешинчи учрашувни ўтказдик. Шу боис чарчоқ аломатлари сезилди. Афсуски, ўзимизга хос бўлмаган ўйинни намойиш этишга ўтиб олдик. Барча масъулиятни ўз бўйнимга оламан. Шогирдларимга ҳеч нарса демайман, чунки улар менинг айтганларимни бажаришди. Орқага йўл йўқ, олдинга қараб ҳаракат қилишда давом этамиз.

- "Бухоро" бугун ҳужумкор ва яхши ўйнади. Жамоангиз бундай ўйинга тайёр эмасмиди?

- Тўғрисини айтсам, бугун рақибнинг кўзида олов кўпроқ кўринди. Бунақаси футболда учраб туради. Лекин бизнинг жамоа ҳам яхши. Битта мағлубият билан ҳаммаси тугаб қолмайди. Футболда ё ютасан ё ютқазасан. Ютсанг хурсанд бўлсан. Мағлубиятга учрасанг, рақибни табриклайсан.

- Сизни яхши мотиватор сифатида биламиз. Кубок учрашувлари битта ўйиндан иборат эканини ҳисобга олсак, Илёс Зейтуллаевга нима етишмади?

- Яна қайтараман, ҳисобни 2:2га олиб келганимиздан сўнг бизда умид уйғонди. Ғалаба қозонишга ҳаракат қилдик. Толиқиб қолганмиз деяпман, лекин "Бухоро" ҳам тинмай ўйинларда майдонга тушяпти. Буниям тан олиш керак. Бугун баъзи футболчиларимизда жароҳат борлиги панд берди. Охирги пайтларда кўп футболчиларимиз деярли 90 дақиқадан ўйнаб келмоқда. Бу ҳам таъсир қилади. Энди озроқ дам олиб Суперлиганинг қолган турларига эътиборни қаратамиз.

Илёс Зейтуллаев: "Бу ўйин менга катта дарс бўлди"