- O'yin haqida fikringiz?

- Birinchi taym qiziq kechdi, faqat taym oxirlarida gol o'tkazib yuborganimiz alamli bo'ldi. Ikkinchi taymda esa toliqib qolganimiz ko'rindi, chunki besh kun oldin "Paxtakor" bilan o'ynab ko'p kuch yo'qotgandik. "Dinamo"ni g'alaba bilan tabriklayman. Biz oxirigacha harakat qildik, lekin ko'p narsa o'xshamadi. Mag'lubiyatdan fojea yasash kerak emas deb hisoblayman. Ishlashda davom etamiz.

- Jamoada darvozabonlar almashib turgani bilan "Bunyodkor" ko'p gol o'tkazyapti.

- Men bu haqda kiyim almashtirish xonasida yigitlarga ham aytdim: futbol - jamoaviy o'yin, yutqazsak aybdor faqat bir kishi bo'lmaydi. Yutsak hammamiz xursand bo'lamiz to'g'rimi? Xuddi shunday mag'lubiyatga uchrasak ham hamma xafa bo'lishi kerak. Ayb faqat darvozabonlarda emas, ko'p hollarda butun jamoa bo'lib diqqatni yo'qotib qo'yyapmiz. "Dinamo"da yaxshi futbolchilar ko'p, bugun raqib o'z imkoniyatlaridan foydalanadi, biz esa foydalana olmadik.

- "Dinamo"ning asosiy futbolchilarida jarohat bor. Jamoa yoshlar bilan o'ynab ham yutib keta oldi. Bu haqda nima deya olasiz?

- Balki bu bahonadek ko'rinishi mumkin, lekin besh kun oldin maydonga tushgan bilan sakkiz kun oldin o'ynagan orasida farq bor. Haftalik ciklda maydonga tushish juda yaxshi. Futbolchilarga bemalol dam berasan, mashg'ulotlar ham zo'r o'tadi. Chempionat oxiriga keldik, jamoamizda toliqish bor. O'ylashimcha, bugun "Dinamo" futbolchilari tetikroq edi.

- Bilamizki, "Bunyodkor" yoshlarga ko'p imkon beradi. Kelasi turlarda boshqa yoshlarni maydonda ko'rishimiz mumkinmi?

- Yoshlarga etibor berayotganimizni aytib o'tganingizdan xursandman. Bu yil ko'p futbolchilar safimizda debyut qilishdi. Lekin men avvalo yoshlarning o'yiniga qarayman, marhamat, kim mashg'ulotda o'zini ko'rsatsa albatta maydonga tushish imkoniga ega bo'ladi. Tarkibimiz yosh va ishlashda davom etyapmiz. Jadvaldagi o'rnimizga qarab bemalol yaxshi mavsumni o'tkazdik deb ayta olaman. Chindan ham tarkibimiz ancha yosh. Akademiyamiz bu borada yaxshi ish olib boryapti. Shuni etiborga oling, men shunchaki yoshlar o'ynashi kerak ekan deb futbolchilarni maydonga tushirmayman. Kim haqli bo'lsa, kim o'zini ko'rsatsa shu o'ynaydi.

- Etakchi futbolchilarning shartnomasi tugayapti deb eshitdik.

- Avval chempionatni tugatib olaylik. Keyin rahbariyat bilan bu haqda gaplashamiz.

Ilyos Zeytullaev: "Chempionat oxiriga keldik, jamoamizda toliqish bor"