- O'yin haqida fikringiz?

- Bu bahsdan ko'p narsa kutgandik. Uchrashuvni yaxshi boshladik. Ammo o'tkazib yuborilgan gol futbolchilarimizga birmuncha yomon tasir qildi. Biz "Surxon" texnik jihatdan yaxshi futbol namoyish etishini bilardik. Bu jamoa xatolarni kechirmaydi. Mag'lubiyatdan to'g'ri xulosa chiqarishimiz kerak.

- "Bunyodkor" grand jamoalar bilan yaxshi o'ynayapti. Biroq o'rtamiyona klublarga kelganda o'zgarib qolyapti. Bu nima bilan bog'liq?

- Bu savolga bitta javob yo'q. "Surxon" ham, biz ham futbol o'ynashni yaxshi ko'ramiz. Lekin futbolda himoyaviy o'yinni maqul ko'radigan jamoalarga qarshi harakat qilish oson emas. Biz ham jamoa sifatida shakllanishga harakat qilyapmiz. Bizda yoshlar ko'p va ularni sekin-asta tarbiyalab boramiz. Ochiq futbol namoyish etadigan jamoalar bilan o'ynash ancha oson. "Paxtakor", "Neftchi" kabi klublarga qarshi alohida ruhiy tayyorgarlik ko'rish shart emas. O'rtamiyona klublar bilan maydonga tushganda mushkul vaziyatga tushib qolyapmiz.

- "Bunyodkor"ni yarim himoyachilar tark etdi va shundan so'ng markazda muammolar yuzaga kelgandek.

- Agar siz Odil Hamrobekovni nazarda tutayotgan bo'lsangiz, juda yaxshi saviyadagi futbolchi jamoamizni tark etdi. Menga Hamrobekovning o'yinga va mashg'ulotlarga bo'lgan munosabati juda yoqdi. U bilan atigi 6 oy ishladik va uning ishga bo'lgan munosabati juda zo'r bo'ldi. Lekin xayrlashishga to'g'ri keldi. Odilning ketishi jamoamizdagi yoshlarga imkoniyat yaratadi. Buni ham hisobga olish lozim. Yoshlar o'sib borishi uchun maydonga tushishlari kerak. Hamrobekov Eronga borgach, yangi jamoasi bilan ilk sovrinni qo'lga kiritdi. Yani, u Eron Superkubogi sohibi bo'ldi va bu yutuq bilan tabriklayman. Biz esa ishlashda davom etamiz.

- Birinchi davra oxirida Nosir Abdusalomov yaxshi o'yin ko'rsatgandi. Ammo hozirgi paytga kelib bu futbolchi zaxirada qolib ketyapti. Bu nima bilan bog'liq?

- Bu ko'proq uning jismoniy holati bilan bog'liq. FIFA kunlari paytida Nosir terma jamoaga ketdi va qaytib kelganidan so'ng jismoniy holatini tiklash ustida ish olib bora boshladi. U mehnat qilishda davom etsa oldinda yaxshi kelajak kutib turibdi.

- Ijtimoiy tarmoqlarda Siz haqingizda iliq gaplar yuribdi va Zeytullaevga birorta terma jamoani berish kerak deb yozishyapti.

- Men hali ancha o'sishim kerak. Erta-indin nima bo'lishini bilmayman, lekin terma jamoada ishlash sharoiti tug'ilsa bundan g'oyat mamnun bo'laman. Hozir esa "Bunyodkor" bilan Superligada o'ynash juda yoqyapti. "Bunyodkor"dek katta klubda ishlash men uchun sharaf. Har kunlik ishimdan zavq olyapman. Kelajakda nima bo'lishini esa vaqt ko'rsatadi.

Ilyos Zeytullaev: "Mag'lubiyatdan to'g'ri xulosa chiqarishimiz kerak"