Balki biroz futboldan uzoqlashganim sababmi yoki yangi chiqayotgan yosh futbolchilarning o'yinini ko'rmasligimmi, xullas bilmadim, lekin 7-8 yil avvalgi futbolni boshqacha yaxshi ko'raman. Yoshi katta insonlar o'zlarining yoshliklaridagi biror musobaqani entikib eslaydi, men hali o'zim yosh bo'lsamda shu 7-8 yil avvalgi futbolni shunaqa xotirlayman.

2010 yildan boshlab futbolga ilk bor qiziqa boshlaganman. JARda bo'lib o'tgan Jahon chempionatidan ikki lahza – balki o'sha vaqtda, balki sal keyinroq takroriy efirlardan ko'rganim – biri, Ronalduning Shimoliy Koreyaga urgan goli, ikkinchisi Aren Robbenning finalda Iker Kasilyas bilan birga-bir vaziyatda gol ura olmagani yodimda. Finalni eslasam hozir ham jahlim chiqadi, bu balki o'sha vaqtda Gollandiyaga muxlisligim sabab yoki Robbenning tushirgan qovuni sabab.

Menga doim Robbenning o'yini doim yoqib kelgan. O'zim ko'rganim – Bavariyaning o'ng qanotidagi Robben FIFA07 da o'ynagan Chelsidagi yoki YouTube`dan videosini ko'rgan Real Madriddagi Robbendan ancha ustun (aslida, chindan ham Robbenning Real va Chelsida o'yini chiqmagan deyishadi). Aren Robbenning o'yinlarini eng ko'p 2012 yilda ko'rganman. Eslayman, ECHL finalida Bavariya – Chelsi o'yinida 120 daqiqa ustunlik qilgan myunxenliklar yakunda baribir mag'lub bo'lishgan. Balki o'sha uchrashuvda Robben qo'shimcha vaqtlarda amalga oshirgan penaltisini golga aylantirganda Bavariya muxlislari ko'z oldida champion bo'larmidi?!

2012/13 yilgi mavsumda esa Bavariya chindan kuchli o'yin ko'rsatgan. O'sha kezlarda nemis klubi chempionatda rekordlarni yangilab yuborgan, ketma-ket ikkinchi yili Chempionlar ligasi finaliga yo'l olgandi. Finaldagi raqib esa boshqa bir nemis jamoasi – Borussiya Dortmund edi. O'sha uchrashuvda ham Robben Roman Vaydenfeller darvozasi tomon 90 daqiqa yo'l topa bilmagan edi. So'nggi daqiqalarda esa yana bir yakkama-yakka vaziyatda niderlandiyalik futbolchi darvozabonni chindan dog'da qoldirgan.

Aytgancha, o'sha musobaqaning yarim finalida Bavariya Barselona bilan o'ynagan va ikki uchrashuv natijasida 7:0 hisobida g'alaba qozongan edi. Javob o'yinida Kamp Nou stadionida Robbenning urgan goli Viktor Valdesning hamon yodida bo'lsa kerak.

Robben terma jamoasidagi eng yorqin vaqtini mening nazarimda 2014 yilgi Jahon chempionatida o'tkazgan. O'sha vaqtda nomi Gollandiya bo'lgan terma jamoa guruhda 2010 yilgi finalchi – Ispaniya bilan tushgan va 1-turdayoq bu ikki terma jamoa o'zaro o'yin o'tkazgan edi. Van Persining goliku alohida mavzu, Robben esa o'yinga nuqtani ajoyib tarzda qo'ygan – qariyb maydon markazidan Ramos bilan to'pga qarab yugurgan golland, unga birinchi etib kelgan va 4 yil oldin birga-bir vaziyatda imkoniyatni boy bergan Kasilyasni “er tishlatgan”di.

Aren haqida uzoq gapirish mumkin. U qaerda bo'lsa ham o'zining o'yinini imkon darajasida ko'rsata olgan futbolchi edi. Men hamisha o'zbek futbolida Robben kabi futbolchi bo'lishini istaganman. Sardor Rashidovning o'yini ko'proq Ronaldu uslubiga o'xshardi, Doston Hamdamovniki ham Robben sifat emas. Jasur Yaxshiboevning Belarusda hujum markaziga qo'yishdi. Bilmadim, keyingi umid kim bo'ladi endi.

Futbol kundan-kun rivojlanib, fan darajasiga chiqib ulgurgan. Robben uslubi esa shu fanning bir bo'limi – uni alohida o'rganish kerak. Bu darajaga chiqish uchun iqtidorning o'zi kamlik qiladi, mehnat qilibgina Robben bo'lish mumkin.

Albatta, bularning barchasi IMHO

IMHO: Futbol fanidagi bir bo'lim haqida